নিয়মীয়া বাৰ্তা ১৯ মাৰ্চঃ নির্বাচনী অধিসূচনা প্রকাশৰ পাছত প্রথমবাৰলৈ আজি দুদিনীয়া ভ্রমণসূচীৰে নির্বাচনী প্রচাৰ চলোৱাৰ উদ্দেশ্যে অসমত উপস্থিত হ’ব কংগ্রেছ নেতা ৰাহুল গান্ধী৷ আজিৰ দিনৰ ১১ বজাত বিশেষ বিমানযোগে কংগ্রেছ নেতাগৰাকী ডিব্রুগড়ত উপস্থিত হ’ব৷ ডিব্রুগড়ত উপস্থিত হৈয়েই ৰাহুল গান্ধী পোনে পোনে লাহোৱালত উপস্থিত হৈ কলেজীয়া ছাত্র–ছাত্রীৰে মত বিনিময় কৰিব৷ এঘণ্টা কলেজীয়া ছাত্র–ছাত্রীৰে মত বিনিময় কৰি গান্ধী চাবুৱাৰ পানীতোলাৰ দিনজয় চাহ বাগিচাত দিনৰ ১ বজাৰ পৰা ২ বজালৈ চাহ শ্রমিকসকলৰ এখন সমাৱেশত অংশগ্রহণ কৰিব৷ ইয়াৰ পাছত তেওঁ ডুমডুমালৈ গৈ এখন নির্বাচনী সমাৱেশ সম্বোধন কৰিব৷ নিশাটো তেওঁ ডিগবৈত কটাব৷ শনিবাৰে তেওঁ পুৱা ১১ বজাৰ পৰা ১২ বজালৈ ডিগবৈ ৰিফাইনেৰীত শ্রমিক–কর্মচাৰীসকলক সৈতে মত বিনিময় কৰিব৷ তাৰ পাছত তেওঁ হেলিকপ্টাৰৰে মৰিয়নিলৈ আহি দিনৰ ১ বজাৰ পৰা ২ বজালৈ এখন নির্বাচনী সমাৱেশ সম্বোধন কৰিব৷ সেই সমাৱেশৰ পাছতেই তেওঁ গহপুৰলৈ উৰা মাৰিব আৰু দিনৰ ২.৩০ বজাৰ পৰা ৩.৩০ বজালৈ গহপুৰত নির্বাচনী সমাৱেশ সম্বোধন কৰিব৷ গহপুৰৰ সমাৱেশৰ পাছত তেওঁ লীলাবাৰীলৈ গৈ বিয়লি ৪ বজাত বিশেষ বিমানযোগে দিল্লীলৈ উৰা মাৰিব৷