নিয়মীয়া বাৰ্তা ২০ মাৰ্চঃ মুম্বাইৰ টপ অর্ডাৰ বেটছমেন সূর্য কুমাৰ যাদৱ, বৰোদাৰ অলৰাউণ্ডাৰ ক্রুনাল পাণ্ডিয়া আৰু কর্ণাটকৰ বেগী বলাৰ প্রসিদ্ধ কৃষ্ণই প্রথমবাৰৰ বাবে ভাৰতীয় এদিনীয়া দললৈ আমন্ত্রণ লাভ কৰিছে৷ ইংলেণ্ডৰ বিৰুদ্ধে অহা ২৩ মার্চৰ পৰা পুনেত আৰম্ভ হ’বলগীয়া তিনিখন মেচৰ শৃংখলাৰ বাবে ৰাষ্ট্রীয় নির্বাচক মণ্ডলীয়ে ঘোষণা কৰা ১৮জনীয়া দলটোত নতুন মুখ হিচাপে এই তিনি উদীয়মান খেলুৱৈক অন্তর্ভুক্ত কৰে৷ সূর্য কুমাৰে যোৱানিশা ইংলেণ্ডৰ বিৰুদ্ধে চতুর্থ টি–২০ত বিস্ফোৰক অর্ধশতকেৰে নির্বাচক মণ্ডলীৰ দৃষ্টি আকর্ষণ কৰিছিল৷ একেদৰে প্রসিদ্ধ কৃষ্ণ আৰু ক্রুনাল পাণ্ডিয়াই সদ্যসমাপ্ত বিজয় হাজাৰে এদিনীয়া ট্রফীত চমকপ্রদ প্রদর্শন দাঙি ধৰিবলৈ সক্ষম হৈছিল৷
সোঁহতীয়া বেগী বলাৰ প্রসিদ্ধই প্রতিযোগিতাখনৰ সাতখন মেচত ১৪টা উইকেট দখল কৰাৰ লগতে ক্রুনালে দুটা শতক আৰু দুটা অর্ধশতক অর্জন কৰিছিল৷ বৰোদাৰ অলৰাউণ্ডাৰগৰাকীয়ে ইতিমধ্যে ভাৰতৰ হৈ ১৮খন টি–২০ খেলিছে যদিও প্রসিদ্ধই প্রথমবাৰৰ বাবে টীম ইণ্ডিয়াৰ জার্ছী পৰিধান কৰাৰ সুযোগ পাব৷
ইফালে, ঋষভ পণ্ট, ভুবনেশ্বৰ কুমাৰ আৰু ৱাশ্বিংটন সুন্দৰে দীর্ঘদিনৰ মূৰত এদিনীয়া দললৈ প্রত্যাৱর্তন ঘটাইছে৷ যশপ্রীত বুমৰাহ আৰু মহম্মদ ছামিৰ অনুপস্থিতিত ভুবনেশ্বৰ কুমাৰে ছার্দুল ঠাকুৰৰ সৈতে ভাৰতৰ পেচ বলিং আক্রমণৰ নেতৃত্ব দিব৷ বাঁওহতীয়া বেগী বলাৰ টি নটৰাজনেও এদিনীয়া দলটোত স্থান লাভ কৰিবলৈ সক্ষম হৈছে৷ অষ্ট্রেলিয়া ভ্রমণত টেষ্ট অভিষেক ঘটোৱা প্রতিভাৱান অ’পেনাৰ শুভমন গীলকো এদিনীয়া দলত প্রথমবাৰৰ বাবে দেখা যাব৷
দলটো হ’ল– কোহলি, ৰোহিত, ধাৱন, গীল, আয়াৰ, সূর্য কুমাৰ, হার্দিক, ঋষভ, ৰাহুল, চাহাল, কুলদীপ, ক্রুনাল, ৱাশ্বিংটন, নটৰাজন, ভুবনেশ্বৰ, মহম্মদ চিৰাজ, ছার্দুল ঠাকুৰ আৰু প্রসিদ্ধ কৃষ্ণ৷