নিয়মীয়া বাৰ্তা, ২১ মাৰ্চঃ গুৱাহাটীৰ অসম ৰাজ্যিক বিদ্যুৎ পৰিষদে ৬৭সংখ্যক ভাৰতৰত্ন লোকপ্রিয় গোপীনাথ বৰদলৈ ট্রফী ফুটবল প্রতিযোগিতাত পঞ্চমবাৰৰ বাবে খিতাপ জয় কৰিছে৷
গুৱাহাটীৰ জজ খেলপথাৰত শনিবাৰে নৈশালোকত অনুষ্ঠিত ফাইনেলত দলটোৱে ডিফেণ্ডিং চেম্পিয়ন অইল ইণ্ডিয়া এফ চিক ২–১ গ’লত পৰাস্ত কৰিবলৈ সক্ষম হয়৷
২০১৯ৰ ফাইনেলত অইল ইণ্ডিয়াৰ হাতত টাইব্রেকাৰত পৰাস্ত হোৱাৰ পোটক তোলাৰ লক্ষ্যৰে খেলপথাৰত নমা বিদ্যুৎ পৰিষদে আৰম্ভণিৰে পৰা আক্রমণাত্মক খেল প্রদর্শন কৰে৷ ২৯ মিনিটত দলটোৱে প্রথমটো সফলতা অর্জন কৰিবলৈ সক্ষম হয়৷ জউগবলা ব্রহ্মই এই গ’লটো কৰে৷ ৪৫ মিনিটত তেওঁ বিদ্যুৎ পৰিষদৰ হৈ আন এটা গ’ল কৰি অগ্রগতি ২–০লৈ বৃদ্ধি কৰে৷ পেনাল্টীৰ সহায়ত ব্রহ্মই দলৰ হৈ দ্বিতীয়টো গ’ল স্ক’ৰ কৰিবলৈ সক্ষম হয়৷
দ্বিতীয়ার্ধত দুলীয়াজানৰ অইল ইণ্ডিয়াই গ’ল দুটা পৰিশোধ কৰিবলৈ আপ্রাণ চেষ্টা চলায় আৰু ৬৯ মিনিটত এটা গ’ল পৰিশোধ কৰে৷ মিলন বসুমতাৰীয়ে এটা পেনাল্টীৰ সহায়ত গ’লটো কৰে৷
উল্লেখ্য যে অসম ৰাজ্যিক বিদ্যুৎ পৰিষদে ঐতিহ্যমণ্ডিত বৰদলৈ ট্রফীত নৱমবাৰৰ বাবে ফাইনেল খেলে৷ ইয়াৰ পূর্বে দলটোৱে ১৯৮৮, ২০০৬, ২০০৯ আৰু ২০১৪ত চেম্পিয়নৰ সন্মান অর্জন কৰিছিল৷ ইফালে, অইল ইণ্ডিয়াই অষ্টমবাৰৰ বাবে বৰদলৈ ট্রফীৰ ফাইনেল খেলে আৰু দলটো ১৯৯০, ২০০৮, ২০১২ আৰু ২০১৯ত চূড়ান্ত বিজয়ী হৈছিল৷