নিয়মীয়া বাৰ্তা, ৪ এপ্ৰিল: শৰাইঘাট জীমৰ উদ্যোগত আৰু অসম বডী বিল্ডার্ছ এণ্ড ফিটনেছ এছ’চিয়েচনৰ সহযোগত অহা ১ মে’ত গুৱাহাটীৰ আৰ জি বৰুৱা ক্রীড়া প্রকল্পস্থিত দেশভক্ত তৰুণৰাম ফুকন ইনড’ৰ ষ্টেডিয়ামত অনুষ্ঠিত হ’ব ৩১সংখ্যক মিষ্টাৰ শৰাইঘাট, আৰ জি বৰুৱা সোঁৱৰণী সর্বভাৰতীয় ক্লাছিক বডী বিল্ডিং চেম্পিয়নশ্বিপ৷ ভাৰতীয় বডী বিল্ডার্ছ ফেডাৰেচন আৰু অসম অলিম্পিক সন্থাৰ স্বীকৃতিপ্রাপ্ত প্রতিযোগিতাখনত আগশাৰীৰ আন্তঃৰাষ্ট্রীয় আৰু ৰাষ্ট্রীয় শৰীৰ চর্চাবিদসকলে অংশগ্রহণ কৰিব৷ মুঠ ৫ লাখ ৮৫ হাজাৰ প্রাইজমানীসমৃদ্ধ প্রতিযোগিতাখনৰ মিষ্টাৰ শৰাইঘাট খিতাপ বিজয়ী শৰীৰ চর্চাবিদে ডেৰ লাখ টকাৰ পুৰস্কাৰ লাভ কৰিব৷
একেদৰে দ্বিতীয় স্থানপ্রাপ্তই এক লাখ, তৃতীয় স্থানপ্রাপ্তই ৮০ হাজাৰ, চতুর্থ স্থানপ্রাপ্তই ৬০ হাজাৰ আৰু পঞ্চম স্থানপ্রাপ্তই ৫০ হাজাৰ টকা লাভ কৰিব৷ ইফালে, একেদিনাই অনুষ্ঠিত হ’ব চতুর্থ বার্ষিক অসমীয়া প্রতিদিন মিষ্টাৰ শৰাইঘাট অসম, সদৌ অসম বডী বিল্ডিং চেম্পিয়নশ্বিপ৷ এই প্রতিযোগিতাৰ মুঠ প্রাইজমানী হ’ল ৮০ হাজাৰ টকা৷ প্রথমবাৰলৈ মহিলাৰ বাবে স্প’টছ মডেল ফিজিক ইভেণ্টো অনুষ্ঠিত হ’ব৷ সবিশেষৰ বাবে ভবজ্যোতি গোস্বামীৰ সৈতে ৯৪০১৩–৮১৬৫৮ নম্বৰত যোগাযোগ কৰিব পাৰে৷