নিয়মীয়া বাৰ্তা ১৫ জুলাইঃ বুধবাৰে সন্ধিয়া নগাঁও–ৰূপহী পথৰ ম’হখুলি–পলাশনিৰ মাজত আৰক্ষীয়ে এখন বাহনলৈ লক্ষ্য কৰি গুলীচালনা কৰা ঘটনাই চাঞ্চল্য সৃষ্টি কৰিছে৷ জানিব পৰা মতে, এ এছ–০৭ বি চি–২২৪৬ নম্বৰৰ টাটা ডি আই বাহনখনলৈ লক্ষ্য কৰি আৰক্ষীয়ে গুলীচালনা কৰে৷ এই গুলীচালনাৰ ঘটনাত কোনো লোকে আহত হোৱা নাই যদিও আৰক্ষীয়ে ৫জন যুৱকক আটক কৰিবলৈ সক্ষম হয়৷
জানিব পৰা মতে, মৰিগাঁৱৰ দিশৰ পৰা লখিমপুৰলৈ যোৱা এই গাড়ীখন মৰিগাঁও আৰক্ষীয়ে অনুসৰণ কৰি আহি নগাঁও আৰক্ষীৰ সহযোগত ম’হখুলি আৰু পলাশনিৰ মাজত গাড়ীখনলৈ গুলীচালনা কৰি ৰখাবলৈ সক্ষম হয়৷ আৰক্ষীয়ে বাহনখনত অহা ৫জন যুৱকক আটক কৰি নগাঁও সদৰ আৰক্ষী থানালৈ আনি জেৰা অব্যাহত ৰাখিছে৷ ইয়াৰে এজনক লৈ আৰক্ষীয়ে অভিযান অব্যাহত ৰাখিছে যদিও আৰক্ষীয়ে এই সন্দর্ভত বিশেষ একো ক’ব বিচৰা নাই৷ আৰক্ষীৰ এক সূত্রই জনোৱা মতে, মৰিগাঁও আৰক্ষীয়ে এক গোপন সূত্রৰ পম খেদি গাডীখনত ড্রাগ্ছ অনাৰ সন্দেহত চলোৱা অভিযানৰ এক অংশ হিচাপে নগাঁৱত গুলীচালনা কৰি গাডীখন জব্দ কৰাৰ লগতে যুৱককেইজনক আটক কৰিবলৈ সক্ষম হয়৷
আন এক সূত্রই জনোৱা মতে, এই যুৱককেইজন ড্রাগ্ছ সৰবৰাহৰ লগত জড়িত৷ সূত্রটোৱে জনোৱা মতে, শাক–পাচলিৰ ব্যৱসায়ৰ ছলেৰে এই ড্রাগ্ছ সৰবৰাহকাৰী যুৱককেইজনে গাডীখনত বুজন পৰিমাণৰ ড্রাগ্ছ আনিছিল৷ আটকাধীন যুৱককেইজনৰ ঘৰ লখিমপুৰ জিলাৰ শিয়ালমাৰীত৷ আটকাধীন যুৱককেইজন ক্রমে ছাইদুল হক, ছফিকুল আলী, নুৰুল হক চৌধুৰী, চাইদুল আলী আৰু আশ্রাদুল্লা৷ আৰক্ষীৰ এক সূত্রই জনোৱা মতে আটক কৰা পাঁচজনৰ ভিতৰত দুর্ধর্ষ ড্রাগ্ছ মাফিয়া আশ্রাদুল্লাক মৰিগাঁও আৰক্ষীয়ে মৰিগাঁৱলৈ লৈ যায়৷ সূত্রটোৱে জনোৱা মতে আশ্রাদুল্লাৰ মৈৰাবাৰীৰ বাসগৃহত আৰক্ষীয়ে তালাচী চলাই ড্রাগ্ছসহ দুখন বিলাসী বাহন জব্দ কৰিছিল যদিও আশ্রাদুল্লা পলাই সাৰিবলৈ সক্ষম হয়৷ তেতিয়াৰ পৰাই মৰিগাঁও আৰক্ষীয়ে ড্রাগ্ছ মাফিয়াজনৰ বিৰুদ্ধে অভিযান অব্যাহত ৰাখিছিল৷ আশ্রাদুল্লাৰ বিৰুদ্ধে মৈৰাবাৰী থানাত ২৬৮/২১ নম্বৰত গোচৰ ৰুজু হৈ আছে৷