নিয়মীয়া বাৰ্তা ২৫ জুলাইঃ দুদিনীয়া মেঘালয়–অসম ভ্রমণসূচীৰে শনিবাৰে শ্বিলঙত উপস্থিত হোৱা কেন্দ্রীয় গৃহমন্ত্রী অমিত শ্বাহে উত্তৰ–পূর্বাঞ্চলৰ ৮খন ৰাজ্যৰ মুখ্যমন্ত্রীৰে মিলিত হ’ল এক ৰুদ্ধদ্বাৰ বৈঠকত৷ দিনটোৰ নির্ধাৰিত কার্যসূচীৰ অন্তত শ্বিলঙৰ পাইনউড হোটেল সংলগ্ন ষ্টেট কনভেনচন চেণ্টাৰত সন্ধিয়া ৬.৩০ বজাৰ পৰা নিশা ৮.৩০ বজালৈ অনুষ্ঠিত এই বৈঠকত উত্তৰ–পূর্বাঞ্চলৰ ৰাজ্যসমূহৰ দীর্ঘদিনীয়া বিভিন্ন সমস্যাই অগ্রাধিকাৰ লাভ কৰে৷
বিশেষকৈ আন্তঃৰাজ্যিক সীমা বিবাদ আৰু ক’ভিড–১৯সৃষ্ট পৰিস্থিতি সন্দর্ভত পর্যালোচনা কৰে কেন্দ্রীয় গৃহমন্ত্রী শ্বাহে৷ গুৰুত্বপূর্ণ বৈঠকখনত অসমৰ মুখ্যমন্ত্রী ড০ হিমন্ত বিশ্ব শর্মাৰ উপৰি মেঘালয়, অৰুণাচল প্রদেশ, ত্রিপুৰা, নাগালেণ্ড, মণিপুৰ, মিজোৰাম আৰু ছিকিমৰ মুখ্যমন্ত্রীসকলৰ লগতে সংশ্লিষ্ট ৰাজ্য চৰকাৰকেইখনৰ মুখ্য সচিব আৰু আৰক্ষী সঞ্চালকপ্রধানসক উপস্থিত আছিল৷
সংবাদ প্রতিষ্ঠান পি টি আয়ে চৰকাৰী সূত্রৰ উদ্ধৃতিৰে প্রকাশ কৰা বাতৰি অনুসৰি উত্তৰ–পূর্বাঞ্চলৰ ৰাজ্যসমূহৰ মাজত দীর্ঘদিন ধৰি বিৰাজ কৰা সীমা সমস্যাৰ বিষয়টো কেন্দ্রীয় গৃহমন্ত্রী শ্বাহে গুৰুত্বসহকাৰে পর্যালোচনা কৰে৷
লগতে তেওঁ উত্তৰ–পূর্বাঞ্চলৰ আটাইকেইখন ৰাজ্যৰ ক’ভিড পৰিস্থিতিৰো বুজ লয়৷
মন কৰিবলগীয়া যে অতি শেহতীয়াকৈ উত্তৰ–পূর্বাঞ্চলৰ অন্যতম দুই ৰাজ্য অসম আৰু মিজোৰামৰ মাজত সীমা বিবাদে গুৰুতৰ ৰূপ ধাৰণ কৰিছে৷ তাৰ মাজতে কেন্দ্রীয় গৃহমন্ত্রী শ্বাহৰ উপস্থিতিত অনুষ্ঠিত এই ৰুদ্ধদ্বাৰ বৈঠক বিবেচিত হৈছে অতি গুৰুত্বপূর্ণ ৰূপে৷ সেইদৰে উত্তৰ–পূর্বাঞ্চলৰ কেইবাখনো ৰাজ্যত ক’ভিড–১৯ৰ দ্বিতীয় জোৱাৰৰ সংক্রমণো দিনকদিনে বৃদ্ধি পাইছে৷
শনিবাৰে এই বৈঠকখনৰ পূর্বে কেন্দ্রীয় গৃহমন্ত্রী শ্বাহে মেঘালয়ৰ কেইবাটাও সংগঠনৰ প্রতিনিধিৰ সৈতেও এখন বৈঠকত মিলিত হয়৷ আজি পুৱাৰ ভাগত কেন্দ্রীয় গৃহমন্ত্রী শ্বাহে ছেৰাপুঞ্জীত উপস্থিত হৈ এখন পানী যোগান আঁচনি উদ্বোধন কৰাৰ লগতে ৰামকৃষ্ণ মিছন পৰিদর্শন কৰাৰ কথা৷ প্রসংগক্রমে উল্লেখ কৰিব পাৰি যে কেন্দ্রীয় গৃহমন্ত্রী শ্বাহৰ অধ্যক্ষতাত অনুষ্ঠিত এই বৈঠকখনত কেন্দ্রীয় ড’নাৰ মন্ত্রী জি কিষাণ ৰেড্ডী, কেন্দ্রীয় গৃহ সচিব অজয় কুমাৰ ভাল্লাকে ধৰি কেইবাজনো বিশিষ্ট ব্যক্তি উপস্থিত আছিল৷