নিয়মীয়া বাৰ্তা, ২৮ জুলাইঃ মিজোৰাম আৰক্ষী আৰু দুর্বৃত্তৰ গুলীত গুৰুতৰভাৱে আঘাতপ্রাপ্ত কাছাৰ জিলাৰ আৰক্ষী অধীক্ষক বৈভৱ চন্দ্রকান্ত নিম্বলকাৰক উন্নত চিকিৎসাৰ বাবে মঙলবাৰে মহাৰাষ্ট্রলৈ লৈ যোৱা হয়৷ ভাৰতীয় বায়ুসেনাৰ বিশেষ বিমানৰ জৰিয়তে তেওঁক শিলচৰৰ পৰা মহাৰাষ্ট্রলৈ লৈ যোৱা হয়৷ ভৰিত পাঁচটাকৈ গুলী লগাৰ ফলত আৰক্ষী অধীক্ষকজন গুৰুতভাৱে আঘাতপ্রাপ্ত হৈছিল৷
সোমবাৰে ঘটনাস্থলীৰ পৰা পোনে পোনে আৰক্ষী অধীক্ষকজনক শিলচৰ মেডিকেল কলেজ হাস্পতাললৈ লৈ অহা হৈছিল৷ এই হাস্পতালতে তেওঁক আই চি ইউত চিকিৎসকে চিকিৎসা প্রদান কৰি আহিছিল যদিও তেওঁৰ আঘাত যথেষ্ট গুৰুতৰ হোৱাৰ বাবে মহাৰাষ্ট্রলৈ নিয়াৰ সিদ্ধান্ত গ্রহণ কৰা হয়৷ শিলচৰ মেডিকেল কলেজৰ অধীক্ষকে সদৰী কৰা অনুসৰি, আৰক্ষী অধীক্ষকজনৰ ভৰিত লগা গুলীৰ ফলত তেওঁৰ কেইবাডালো হাড় টুকুৰা টুকুৰকৈ ভাঙি গৈছে৷ যাৰ বাবে তেওঁক জটিল অস্ত্রোপচাৰৰ প্রয়োজন হ’ব৷
অৱশ্যে সম্প্রতি আৰক্ষী অধীক্ষকজনৰ স্বাস্থ্যৰ অৱস্থা সুস্থিৰ বুলি সদৰী কৰি হাস্পতালৰ অধীক্ষকজনে কয়– ‘চিকিৎসাৰ বাবে লৈ অহাৰ সময়ত নিম্বলকাৰৰ ভৰিৰ পৰা যথেষ্ট ৰক্তক্ষৰণ হৈছিল৷ সম্প্রতি চিকিৎসাৰ পিছত ৰক্তক্ষৰণ বন্ধ হৈছে৷ সম্প্রতি তেওঁৰ স্বাস্থ্যৰ অৱস্থা সুস্থিৰ৷ কালি চিকিৎসালয়লৈ অনাৰ সময়ত তেওঁ যথেষ্ট বিষ অনুভৱ কৰিছিল যদিও সেয়াও হ্রাস পাইছে৷’
উল্লেখ্য যে কাছাৰ জিলাৰ আৰক্ষী অধীক্ষক নিম্বলকাৰে হাস্পতালৰ বিছনাৰ পৰাই এই বিপদৰ সময়ত ৰাজ্য চৰকাৰে কৰা সহায়ৰ বাবে কৃতজ্ঞতা জ্ঞাপন কৰে৷ সম্প্রতি তেওঁ যথেষ্ট সুস্থিৰ অনুভৱ কৰিছে বুলি উল্লেখ্য কৰি সংবাদ মাধ্যমৰ আগত কয় যে মুখ্যমন্ত্রী, অসম আৰক্ষীৰ সঞ্চালকপ্রধান, ৰাজ্য চৰকাৰ, বিভাগীয় মন্ত্রীসকলে তেওঁক যথেষ্ট সহায় কৰিছে৷
তদুপৰি বহুসংখ্যক লোকে তেওঁৰ আৰোগ্য কামনা কৰি শুভেচ্ছা জ্ঞাপন কৰিছে৷ সকলোকে তেওঁ সংবাদ মাধ্যমৰ জৰিয়তে কৃতজ্ঞতা জ্ঞাপন কৰে৷ ইপিনে আৰক্ষী অধীক্ষকজনৰ উপৰি আন তিনিজন গুৰুতৰভাৱে আঘাতপ্রাপ্ত জোৱানকো আজি বিমানযোগে গুৱাহাটী চিকিৎসা মহাবিদ্যালয় হাস্পতাললৈ লৈ অহা হৈছে৷