নিয়মীয়া বাৰ্তা, ৮ আগষ্টঃ পঞ্জাবৰ ম’হালিত দিন–দুপৰতে আকালি দলৰ যুৱনেতা এজনক দুর্বৃত্তই গুলীয়াই হত্যা কৰা আৰু এই গুলীচালনাৰ ঘটনা কেমেৰাত বন্দী হোৱাৰ পিছতেই চাঞ্চল্যৰ সৃষ্টি হৈছে৷
ঘটনাৰ বিৱৰণী মতে, শনিবাৰে পুৱা ১০.৩০ বজাত ম’হালিৰ মাটুৰ বজাৰত দুজন অচিনাক্ত বন্দুকধাৰীয়ে আকালি দলৰ যুৱনেতা বিকি মিদ্দুখেৰাক খেদি খেদি গুলীয়াই হত্যা কৰে৷ অচিনাক্ত বন্দুকধাৰীয়ে যুৱনেতাজনক ১৫ জাঁই গুলী নিক্ষেপ কৰে৷ উল্লেখ্য যে দুজন অচিনাক্ত বন্দুকধাৰীয়ে হোণ্ডাই আই–২০ কাৰ এখনেৰে আহি বজাৰ অঞ্চলত আকালি যুৱনেতাজনক আগুচি ধৰে আৰু জধেমধে গুলীচালনা কৰে৷ তথ্য মতে মাটুৰ বজাৰত এজন বন্ধুক লগ কৰিবলৈ অহা যুৱনেতা মিদ্দুখেৰাক অচিনাকি দুর্বৃত্তই গুলীয়াই থৈ যোৱাৰ পিছত ততালিকে হাস্পতাললৈ নিয়া হয় যদিও যুৱনেতাজনৰ মৃত্যু হয়৷ আৰক্ষীয়ে চিচি টিভিৰ সহায়ত অচিনাক্ত বন্দুকধাৰীক চিনাক্ত কৰাৰ পদক্ষেপ লৈছে৷