নিয়মীয়া বাৰ্তা ১১ আগষ্টঃ টকিঅ’ অলিম্পিকত দেশৰ তাৰকা জেভলিন থ্র’ৱাৰ নীৰজ চোপ্রাই স্বর্ণপদক জয়েৰে ইতিহাস ৰচা দিনটোক ভাৰতীয় এথলেটিক্ছ ফেডাৰেচনে ৰাষ্ট্রীয় জেভলিন দিৱস হিচাপে উদযাপন কৰিব৷ ফেডাৰেচনৰ প্লেনিং কমিছনৰ অধ্যক্ষ ললিত ভান’টে মঙলবাৰে এই কথা ঘোষণা কৰে৷
উল্লেখ্য যে হাৰিয়ানাৰ প্রতিভাৱান জেভলিন থ্র’ৱাৰ নীৰজ চোপ্রাই যোৱা ৭ আগষ্টত টকিঅ’ৰ ট্রেক এণ্ড ফিল্ডত খলকনি তুলি ৮৭.৫৮ মিটাৰ থ্র’ কৰি দেশলৈ ঐতিহাসিক সোণৰ পদক কঢ়িয়াই আনে৷ ‘জেভলিন থ্র’ক দেশত অধিক জনপ্রিয় কৰি তুলিবলৈ আমি ৭ আগষ্টৰ দিনটোক ৰাষ্ট্রীয় জেভলিন দিৱস হিচাপে উদযাপন কৰিম৷ অহা বর্ষৰ পৰা এই দিনটোত আমাৰ স্বীকৃতিপ্রাপ্ত সংস্থাসমূহে সকলো ৰাজ্যত জেভলিন প্রতিযোগিতাৰ আয়োজন কৰিব৷ আন্তঃজিলা পর্যায়তো জেভলিনৰ বিভিন্ন প্রতিযোগিতা আয়োজনৰ চিন্তা–চর্চা কৰা হৈছে৷ প্রতিযোগিতা আয়োজনৰ লগতে আমি জেভলিনৰ আন্তঃগাঁথনি উন্নত কৰিব লাগিব৷’ ভাৰতীয় এথলেটিক্ছ ফেডাৰেচনৰ বিষয়াগৰাকীয়ে এইদৰে কয়৷
উল্লেখ্য যে ভাৰতীয় এথলেটিক্ছ ফেডাৰেচনে ২০১৮ত ৰাষ্ট্রীয় মুকলি জেভলিন থ্র’ চেম্পিয়নশ্বিপ আৰম্ভ কৰিছিল৷ চলিত বর্ষৰ অক্টোবৰত এই প্রতিযোগিতাৰ তৃতীয় সংস্কৰণ অনুষ্ঠিত হ’ব৷