নিয়মীয়া বাৰ্তা, ২২ আগষ্ট: জম্মু–কাশ্মীৰৰ পুলৱামা জিলাৰ অৱন্তিপৰাৰ নাগবাৰেন ট্রলত নিৰাপত্তা বাহিনীৰ গুলীত পাকিস্তানী নিষিদ্ধ সন্ত্রাসবাদী সংগঠন জইচ–ই–মহম্মদৰ তিনি দুর্ধর্ষ সন্ত্রাসবাদী নিহত হৈছে৷ কাশ্মীৰ আৰক্ষীয়ে টুইটযোগে প্রকাশ কৰা মতে অৱন্তিপৰাৰ নাগবাৰেন ট্রলৰ বনাঞ্চলত সন্ত্রাসবাদী গোটৰ সৈতে অভিযানকাৰী নিৰাপত্তা বাহিনীৰ সংঘর্ষ হয়৷ এই সংঘর্ষত নিৰাপত্তা বাহিনীয়ে তিনি দুর্ধর্ষ জেইএম সন্ত্রাসবাদীক গুলীয়াই হত্যা কৰিবলৈ সক্ষম হৈছে৷ নিহত সন্ত্রাসবাদী তিনিটাক এতিয়াও চিনাক্ত কৰিব পৰা নাই৷
আৰক্ষীৰ মতে নিহত সন্ত্রাসবাদী তিনিটা পাকিস্তানৰ নাগৰিক হ’ব পাৰে৷ উল্লেখ্য যে কালি পুলৱামা জিলাৰ খ্রিউ অঞ্চলত নিৰাপত্তা বাহিনী আৰু সন্ত্রাসবাদী গোটৰ মাজত হোৱা সংঘর্ষত হিজবুল মুজাহিদীনৰ দুটা সন্ত্রাসবাদী নিহত হৈছিল৷ কাশ্মীৰ উপত্যকাত চলিত বর্ষত এতিয়ালৈকে ৯৪টা সন্ত্রাসবাদী নিৰাপত্তা বাহিনীৰ হাতত নিহত হৈছে৷ চলিত মাহটোত ৮ সন্ত্রাসবাদী নিহত হৈছে৷