নিয়মীয়া বাৰ্তা ৩০ আগষ্টঃ পূব শৰণীয়াৰ এটা ভাৰাঘৰত জন্মদিনৰ পার্টীত ড্রাগ্ছ সেৱন কৰি থকাৰ সময়তে চানমাৰি আৰক্ষীয়ে অভিযান চলাই হেৰ’ইনসহ চাৰিটা ড্রাগ্ছ সৰবৰাহকাৰীক আৰক্ষীয়ে গ্রেপ্তাৰ কৰিছিল৷ ধৃত ড্রাগ্ছ সৰবৰাহকাৰীকেইটাৰ্ স্বীকাৰোক্তিৰ ভিত্তিত আজি পুৱতি নিশা জ্যোতিকুছি আৰু পাঞ্জাবাৰীত পৃথকে পৃথকে অভিযান চলাই আৰক্ষীয়ে ৩.৫ কোটি টকাৰ ড্রাগ্ছসহ দুই সৰবৰাহকাৰীক গ্রেপ্তাৰ কৰিবলৈ সক্ষম হয়৷ ধৃত ড্রাগ্ছ সৰবৰাহকাৰী দুটা ক্রমে– কৰণ দাস (২৩) আৰু স্বৰগম দাস (২৮)৷ অভিযানকাৰী দলটোৱে জ্যোতিকুছিৰ কৰণৰ বাসগৃহৰ পৰা ২৩টা পেকেট হেৰ’ইন আৰু নগদ ৭,০৫,৮৬০ টকা জব্দ কৰে৷
ইফালে, অভিযানকাৰী দলটোৱে পাঞ্জাবাৰী বতাহঘুলিত অভিযান চলাই স্বৰগম দাসৰ বাসগৃহত অভিযান চলাই ১২ পেকেট হেৰ’ইন, নগদ ১২ হাজাৰ টকা আৰু এএছ–০১–ডিডব্লিউ–৬০৪৬ নম্বৰৰ এখন কুইড বাহন জব্দ কৰে৷ আৰক্ষীয়ে দুই ড্রাগ্ছ সৰবৰাহকাৰীৰ পৰা জব্দ কৰা হেৰ’ইনখিনিৰ ওজন প্রায় ৫০০ গ্রাম৷ জব্দকৃত হেৰ’ইনখিনিৰ বজাৰ মূল্য প্রায় ৩.৫ কোটি টকা হ’ব বুলি আৰক্ষীয়ে জানিবলৈ দিছে৷ সম্প্রতি চানমাৰি থানাৰ আৰক্ষীয়ে ড্রাগ্ছ সৰবৰাহকাৰীকেইটাক্ জেৰা অব্যাহত ৰাখিছে৷ আৰক্ষীৰ জেৰাত ধৃত ড্রাগ্ছ সৰবৰাহকাৰীকেইটাই মিজোৰামৰ পৰা গুৱাহাটীলৈ ড্রাগ্ছ সৰবৰাহ কৰি বিক্রী কৰি অহাৰ কথা স্বীকাৰ কৰিছে৷ এই ড্রাগ্ছ সৰবাৰহকাৰী চক্রটোৰ সৈতে গুৱাহাটীৰ বহু অভিজাত পৰিয়ালৰ যুৱক–যুৱতী জড়িত থকাৰ তথ্যও আৰক্ষীয়ে লাভ কৰিছে৷ তদন্তৰ খাতিৰত এই তথ্য আৰক্ষীয়ে প্রকাশ কৰা নাই যদিও শীঘ্রে বহু ড্রাগ্ছ সৰবৰাহকাৰী আৰক্ষীৰ জালত পৰাৰ সম্ভাৱনা আছে৷