স্পেইনত পতিতা বৃত্তিক ‘অপৰাধী কার্য’ ঘোষণা প্রধানমন্ত্রী পেড্র’ ছানচেজৰ

নিয়মীয়া বাৰ্তা ১৯ অক্টোবৰঃ ইউৰোপীয় দেশ স্পেইনৰ প্রধানমন্ত্রী পেড্র’ ছানচেজে দেশখনত পতিতা বৃত্তিক অপৰাধী কার্য বুলি ঘোষণা কৰিছে৷ দেশখনৰ ভেলেঞ্চিয়া চহৰত ছ’চিয়েলিষ্ট পার্টীৰ তিনিদিনীয়া কংগ্রেছৰ অন্তিম দিনাখন প্রধানমন্ত্রীগৰাকীয়্ সমর্থকসকলক সম্বোধি কয় যে পতিতা বৃত্তিয়ে মহিলাসকলক দাসী হ’বলৈ বাধ্য কৰাইছে৷ স্মর্তব্য যে ১৯৯৫ চনত স্পেইনত পতিতা বৃত্তিক বৈধতা প্রদান কৰা হৈছে৷ ২০১৬ চনত ৰাষ্ট্রসংঘই চলোৱা এক সমীক্ষা অনুসৰি দেশখনত ছেক্স ইণ্ডাষ্ট্রীৰ বার্ষিক ধনৰ পৰিমাণ আছিল ৪২০ কোটি ডলাৰ৷

২০০৯ চনত চলোৱা এক সমীক্ষা অনুসৰি স্পেইনৰ প্রতি তিনিজন পুৰুষৰ এজনে যৌনতাৰ বাবে ধন আদায় দিয়ে৷ ৰাষ্ট্রসংঘৰ তথ্য অনুসৰি বিশ্বৰ ভিতৰত পতিতা বৃত্তি চলা দেশৰ তালিকাত স্পেইন আছে তৃতীয় স্থানত৷ ইয়াৰ ওপৰত ক্রমে প্রথম আৰু দ্বিতীয় স্থানত আছে থাইলেণ্ড আৰু পুৱের্টো ৰিকো৷ স্পেইনত পতিতা বৃত্তি বৈধ বাবেই ইয়াক লৈ সৃষ্টি হোৱা অপ্রীতিকৰ পৰিস্থিতিৰ বাবে কোনোধৰণৰ শাস্তি প্রদান কৰা নহয়৷ কিন্তু এই পৰম্পৰাৰ অন্ত পেলোৱাৰ সংকল্প লৈছে প্রধানমন্ত্রী ছানচেজে৷ প্রধানমন্ত্রীগৰাকীৰ্ এই সিদ্ধান্তক গৰিষ্ঠসংখ্যক লোকে আদৰণি জনাইছে যদিও ইয়াৰ ফলত তিনি লক্ষাধিক যৌন কর্মীৰ জীৱিকালৈ সংকট নামি অহাৰ আশংকা আছে৷