দেওবাৰৰ মৰণপণ যুঁজত চাপত থাকিব ভাৰত

নিয়মীয়া বাৰ্তা ২৯ অক্টোবৰঃ  চিৰবৈৰী পাকিস্তানৰ হাতত প্রথমখন মেচতে শোচনীয় পৰাজয়ৰ সন্মুখীন হোৱাৰ পিছত টীম ইণ্ডিয়াৰ বাবে টি–২০ বিশ্বকাপৰ ছেমিফাইনেলৰ পথ কঠিন হৈ পৰিছে৷ গ্রুপ পর্যায়ৰ পৰা ছেমি ফাইনেললৈ উন্নীত হ’বলৈ দলটোৱে অহা দেওবাৰে নিউজিলেণ্ডক পৰাস্ত কৰিব লাগিব৷ মৰণপণ যুঁজসদৃশ এই মেচখনত পৰাস্ত হ’লে বিৰাট কোহলি বাহিনী টি–২০ বিশ্বকাপৰ গ্রুপ পর্যায়ৰ পৰাই বিদায় মগাটো একপ্রকাৰ নিশ্চিত হ’ব৷ ইফালে, আই চি চি ইভেণ্টত নিউজিলেণ্ডৰ বিৰুদ্ধে ভাৰতৰ পৰিসংখ্যা যথেষ্ট দুর্বল৷ আই চি চি ইভেণ্টত ভাৰতে ২০০৩তে নিউজিলেণ্ডৰ বিৰুদ্ধে অন্তিমবাৰৰ বাবে জয়ৰ সোৱাদ লাভ কৰিছিল৷ ২০০৩ৰ এদিনীয়া বিশ্বকাপত সৌৰভ গাংগুলী নেতৃত্বাধীন টীম ইণ্ডিয়াই চেঞ্চুৰিয়ানত নিউজিলেণ্ডক ৭ উইকেটত পৰাস্ত কৰাৰ পিছত প্রতিবাৰে দলটো আই চি চি ইভেণ্টত কিৱিৰ বিৰুদ্ধে ব্যর্থ হৈ আহিছে৷

২০০৭ৰ টি–২০ বিশ্বকাপৰ গ্রুপৰ মেচত মহেন্দ্র সিং ধোনী নেতৃত্বাধীন টীম ইণ্ডিয়াক নিউজিলেণ্ডে ১০ ৰানত পৰাস্ত কৰিছিল৷ একেদৰে ২০১৬ৰ টি–২০ বিশ্বকাপত ঘৰুৱা দল ভাৰত কিৱিৰ হাতত ৪৭ ৰানত বিধ্বস্ত হৈছিল৷ ২০১৯ৰ এদিনীয়া বিশ্বকাপৰ ছেমিফাইনেলত ভাৰতে নিউজিলেণ্ডৰ বিৰুদ্ধে ব্যর্থতাৰ ইতিহাস সলনি কৰাৰ সুবর্ণ সুযোগ লাভ কৰিছিল যদিও কেন উইলিয়ামছন বাহিনীয়ে ১৮ ৰানত জয়েৰে শেষ হাঁহি মাৰিছিল৷

শেহতীয়াকৈ ২০২১ৰ বিশ্ব টেষ্ট চেম্পিয়নশ্বিপৰ ফাইনেলতো নিউজিলেণ্ডে ভাৰতক স্তব্ধ কৰি খিতাপ হস্তগত কৰিবলৈ সক্ষম হৈছিল৷ আই চি চি ইভেণ্টত নিউজিলেণ্ডৰ বিৰুদ্ধে এই দীঘলীয়া ব্যর্থতাৰ অৱসান ঘটাবলৈ কোহলি বাহিনীয়ে দেওবাৰে টি–২০ বিশ্বকাপত উৎকৃষ্ট প্রদর্শন দাঙি ধৰিব লাগিব৷ গুৰুত্বপূর্ণ মেচখনত জয় সাব্যস্ত কৰা দলটোৱে ছেমি ফাইনেলৰ পথ একপ্রকাৰ নিশ্চিত কৰিব পাৰিব৷ ইফালে, দেওবাৰৰ অগ্ণিপৰীক্ষাৰ প্রতি লক্ষ্য ৰাখি টীম ইণ্ডিয়াই  নেটত যথেষ্ট সময় ধৰি অনুশীলন চলোৱা দেখা যায়৷ তাৰকা অলৰাউণ্ডাৰ হার্দিক পাণ্ডিয়াক দীর্ঘদিনৰ মূৰত আজি বলিং কৰা দেখিবলৈ পোৱা যায়৷