নিয়মীয়া বাৰ্তা, ২ নৱেম্বৰঃ “মোক বিশ্বাসঘাতক নহয়, বিশ্বাসযোগ্য বুলিহে গণ্য কৰিলে থাওৰাৰ ৰাইজে। অনাগত দিনত আমি শক্তিশালীভাৱে কাম কৰি যাম। এটা দল এৰি আন এটা দললৈ যোৱাৰ পাছতো থাওৰাবাসীয়ে যে আমাক বিশ্বাস কৰি নিৰ্বাচিত কৰিলে তাৰবাবে সমূহ থাওৰাবাসীকে ধন্যবাদ জনাইছো।”-আজি উপ নিৰ্বাচনত থাওৰাৰ পৰা নিৰ্বাচনত বিজয়ী হৈ এই মন্তব্য সুশান্ত বৰগোহাঁইৰ।
থাওৰা সমষ্টিত বিপুল ভোটত জয়ী হৈছে বিজেপি প্ৰাৰ্থী সুশান্ত বৰগোঁহাই। ৩০,৫৬১ টা ভোটৰ ব্যৱধানত জয়লাভ কৰিলে সুশান্ত বৰগোহাঁয়ে। সুশান্ত বৰগোহাঁয়ে লাভ কৰিলে মুঠ ৫৪,৯৫৬ টা ভোট। আনহাতে তেওঁৰ নিকটতম প্ৰাৰ্থী ৰাইজৰ দলৰ ধৈৰ্য্য কোঁৱৰে লাভ কৰে ২৪,৩৯৫ টা ভোট।
ইয়াৰোপৰি সাংবাদিকৰে হোৱা বাৰ্তালাপত সুশান্ত বৰগোহাঁইয়ে কয়, “এই বিজয় আপোনালোকৰ আন্তৰিক শুভকামনা আৰু পৰিশ্ৰমৰ ফল। এই জয় থাওৰাবাসীৰ জয়, থাওৰাবাসীৰ সঠিক সিদ্ধান্তৰ জয়। পশ্চাদমুখী অৱৰোহন আৰু স্থিতাৱস্থাৰ বিপৰীতে থাওৰাবাসীয়ে আজি উন্নয়ন আৰু প্ৰগতিৰ সপক্ষে ভোটদান কৰা বাবে থাওৰাৰ প্ৰত্যেকজন নাগৰিকলৈ শ্ৰদ্ধাভৰা সেৱা আৰু আন্তৰিক ধন্যবাদ জ্ঞাপন কৰিলোঁ।
এই সফলতা প্ৰাপ্তিৰ পথত আমাক প্ৰতিনিয়ত সংগ দিয়া মুখ্যমন্ত্ৰী ড° হিমন্ত বিশ্ব শৰ্মা ডাঙৰীয়া, প্ৰাক্তন মুখ্যমন্ত্ৰী তথা কেন্দ্ৰীয় মন্ত্ৰী সৰ্বানন্দ সোণোৱাল ডাঙৰীয়া, বিজেপি অসম প্ৰদেশৰ সভাপতি ভবেশ কলিতা ডাঙৰীয়া প্ৰমুখ্যে সমূহ মন্ত্ৰী, সাংসদ, বিধায়কসকল, মিত্ৰজোঁটৰ সমূহ বিষয় ববীয়াসকল, দলৰ জ্যেষ্ঠ বিষয়ববীয়াসকল, দলৰ সকলো শ্ৰেণীৰ সন্মানীয় কাৰ্যকৰ্তাসকল তথা মোৰ শ্ৰদ্ধাৰ ৰাইজক আন্তৰিক ধন্যবাদ জনালোঁ।
থাওৰা সমষ্টি ৰাইজৰ আশা-আকাংক্ষাক আন্তৰিকতাৰে বাস্তৱ ৰূপ দিয়াৰ লগতে থাওৰা সমষ্টিৰ উন্নয়ন আৰু প্ৰগতিৰ যাত্ৰাত অহোপুৰুষাৰ্থ কৰি যাবলৈ মই বদ্ধপৰিকৰ। এই গুৰু দায়িত্ব সুচাৰুৰূপে পালন কৰি যোৱাৰ ক্ষেত্ৰত ৰাইজৰ স্নেহাশিস কামনা কৰিলোঁ।”