নিয়মীয়া বাৰ্তা, ১৬ জানুৱাৰীঃ অস্কাৰলৈ মনোনীত হোৱা প্ৰথমখন অসমীয়া ছবি ভিলেজ ৰকষ্টাৰছ্ আৰু বিশ্বৰ বহু চলচ্চিত্ৰ বঁটা আঁজুৰি অনা বুলবুল কেন ছিং এতিয়াৰে পৰা উপলব্ধ হ’ব নেটফ্লিক্সত । সততে অসমীয়া ছবি এখন ছবিগৃহত মুক্তিৰ পাচত দৰ্শকে উপভোগ নকৰিলে বঞ্চিত হয় ছবিখন উপভোগৰ পৰা । কিন্তু এই জটিলতাৰ অৱসান ঘটাই নেটফ্লিক্সত উপলব্ধ হ’ল ছবি পৰিচালক ৰীমা দাসৰ বহু সমাদৃত দুয়োখন ছবি ভিলেজ ৰকষ্টাৰছ্ আৰু বুলবুল কেন ছিঙ ।
ছবি পৰিচালক ৰীমা দাসে তেওঁৰ ফেচবুক পেজৰ জৰিয়তে প্ৰকাশ কৰে এই কথা । ৰীমা দাসে জনোৱা অনুসৰি নেটফ্লিক্সত বুলবুল কেন ছিং ছবিখন সমগ্ৰ বিশ্বতে মুক্তি পোৱাৰ লগতে বুলুবুল কেন ছিং ছবিখন কেৱল ভাৰতৰ দৰ্শকৰ বাবেহে উপলব্ধ হ’ব । ভিলেজ ৰকষ্টাৰছ্ ছবিখন নেটফ্লিক্সত ভাৰতৰ দৰ্শকৰ বাবে মুকলি পোৱাৰ বিপৰীতে এমাজন প্ৰাইমত সকলো দেশৰ লোকৰ বাবেই মুকলি হ’ব ভিলেজ ৰকষ্টাৰছ্ ।