নিয়মীয়া বাৰ্তা, ১৫ডিচেম্বৰঃআজি সন্ধিয়া প্ৰায় ৫.৩০বজাত নগাঁও চহৰৰ খুটিকটীয়াত এক গুলীচালনাৰ ঘটণা সংঘটিত হয়। আৰক্ষী সূত্ৰই জনোৱা মতে,আজি সন্ধিয়া নগাঁৱৰ উপ আৰক্ষী অধীক্ষক ত্ৰিদীপ কুম্বাঙৰ নেতৃত্বত নগাঁও আৰক্ষীৰ নাৰ্কোটিক স্কোৱাৰ্ডৰ এটা দলে চহৰ খনৰ লক্ষীনগৰ চাৰিআলিত ড্ৰাগছ বিৰোধী অভিযান হিচাপে একাংশ যানবাহনৰ তালাচী চলাই আছিল।আৰক্ষীয়ে বিশেষ সূত্ৰৰ পৰা খবৰ লাভ কৰিছিল যে এখন চুইফট দিজায়াৰ গাড়ীত একাংশ লোকে ড্ৰাগছ সৰবৰাহ কৰি আনিছে। সেই সময়তে নগাঁৱৰ পৰা গুৱাহাটী অভিমুখে তীব্ৰ বেগেৰে গৈ থা চুইফট দিজায়াৰ গাড়ীক সেই স্থানত ৰ’বলৈ নিৰ্দেশ দিয়া হয়। কিন্তু গাড়ী খনে আৰক্ষী বিষয়া কুম্বাঙক খুন্দিয়াবলৈ উদ্যত হৈ পলায়ন কৰে।লগে লগে আৰক্ষী বিষয়া কুম্বাঙেও এজন কনিষ্টবল লগত লৈ এখন মটৰ চাইকেলেৰে গাড়ী খনক পিছে পিছে খেদি যায়। কিন্তু ড্ৰাগছ সৰবৰাহ কৰা গাড়ী বুলি সন্দেহ কৰা গাড়ী খনে আৰু অধিক দ্ৰুত গতিত গুৱাহাটীৰ দিশে পলায়ন কৰাত খুটিকটীয়াৰ ৰেডিঅ’চেন্টাৰৰ ওচৰত আৰক্ষী বিষয়া কুম্বাঙে গাড়ী খনৰ টায়াবলৈ বুলি লক্ষ্য কৰি দুই জাঁই গুলী চালনা কৰে। আৰক্ষীৰ এই গুলী চালনাত কোনো লোক হতাহত হোৱা নাই। বৰঞ্চ চুইফট দিজায়াৰ গাড়ী খনে পলায়নহে কৰে।পাছত ঘটণাস্থলীৰ পৰা আৰক্ষীয়ে দুটা খালি কাৰ্টিজ উদ্ধাৰ কৰে। ইতিমধ্যে নগাঁও আৰক্ষীয়ে পলায়ন কৰা চুইফট দিজায়াৰ গাড়ী খনৰ সন্ধানত অভিযান আৰম্ভ কৰিছে।