নিয়মীয়া বাৰ্তা, ১৬ ডিচেম্বৰঃ বাংলাদেশৰ স্বাধীনতাৰ স্বর্ণ জয়ন্তী অনুষ্ঠানত যোগ দিবলৈ পত্নী আৰু কন্যাৰ সৈতে দেশখনৰ ৰাজধানী ঢাকাত উপস্থিত হৈছে ভাৰতৰ ৰাষ্ট্রপতি ৰামনাথ কোৱিন্দ৷ তিনিদিনীয়া বাংলাদেশ ভ্রমণসূচীৰে ঢাকাত উপস্থিত হোৱা ভাৰতৰ ৰাষ্ট্রপতি কোৱিন্দে বিভিন্ন কার্যসূচীত অংশগ্রহণ কৰিব৷ ইণ্ডিয়ান এয়াৰলাইনছৰ এখন বিশেষ বিমানেৰে বুধবাৰে দিনৰ ১১.১০ বজাত ঢ়াকাত হজৰত শ্বাহজালাল আন্তর্জাতিক বিমানবন্দৰত অৱতৰণ কৰে ভাৰতৰ ৰাষ্ট্রপতিগৰাকীয়ে৷ বিমানবন্দৰত সপত্নীক বাংলাদেশৰ ৰাষ্ট্রপতি মহম্মদ আব্দুল হামিদে আদৰণি জনায় ৰামনাথ কোৱিন্দক৷
স্মর্তব্য যে ভাৰতৰ ৰাষ্ট্রপতি কোৱিন্দৰ এয়া হৈছে প্রথম বাংলাদেশ ভ্রমণ৷ বিমানবন্দৰত আদৰণি জনোৱাৰ পিছত বাংলাদেশৰ তিনিওটা সশস্ত্র বাহিনীৰ তৰফৰ পৰা গার্ড অৱ অনাৰ প্রদান কৰা হয় কোৱিন্দক৷