নিয়মীয়া বাৰ্তা, ২১ ডিচেম্বৰঃ আজি কাহিলি পুৱাতে নগাঁও আৰক্ষীয়ে এক অভিযান চলাই চহৰ খনৰ পাৰ্শ্বৱৰ্তী চলচলিৰ শিমলুগুৰি নতুন মাৰ্কেটৰ ওচৰত দুজন অবৈধ অস্ত্ৰ ব্যৱসায়ী যুৱকক গ্ৰেপ্তাৰ কৰে।ধৃত অস্ত্ৰ সৰবৰাহকাৰী দুজন হ’ল জুৰীয়া দগাঁও গৰৈমাৰী পামৰ ইক্ৰামূল হুছেইন (৩৯) আৰু মিনাজ উদ্দিন আহমেদ (২৬) আৰক্ষীয়ে ধৃত অস্ত্ৰ সৰবৰাহকাৰী দুজনৰ পৰা এটা ফেক্টৰীত নিৰ্মিত পইন্ট ২২পিষ্টল ,এটা মেগাজিন আৰু তিনি জাঁই পইন্ট ২২পিষ্টলৰ সক্ৰিয় গুলীৰ লগতে তেওঁ লোকে চলাই অহা এ এছ ১২ ডব্লিউ ২৩৩৬নম্বৰৰ কে টি এম মটৰ চাইকেল খনো জব্দ কৰে।
নগাঁও চহৰৰ হয়বৰগাঁও আৰক্ষী চকীৰ ভাৰপ্ৰাপ্ত আৰক্ষী বিষয়া তৰংগ পাটোৱাৰীয়ে সাংবাদিকৰ আগত প্ৰকাশ কৰা অনুসৰি, নগাঁও আৰক্ষীয়ে এক বিশেষ সূত্ৰৰ জৰিয়তে জানিব পাৰে যে নগাঁও চহৰৰ ধিং গেটৰ পৰা দুজন যুৱকে এখন মটৰ চাইকেলেৰে এটা পিষ্টল ধিং দিশে লৈ গৈ আছে।লগে লগে নগাঁও আৰক্ষীৰ এটা দলে অস্ত্ৰ সৰবৰাহকাৰী যুৱক দুজনৰ মটৰ চাইকেল খনক পিছে পিছে খেদি যায়। আৰক্ষীৰ দলটোৱে যুৱক দুজনক নগাঁও-ধিং পথেৰে পিছে পিছে খেদি গৈ চলচলিৰ ওচৰৰ শিমলুগুৰি নতুন মাৰ্কেটৰ ওচৰত কৰায়ত্ত কৰিবলৈ সক্ষম হয়।লগে লগে আৰক্ষীয়ে যুৱক দুজনে ব্যৱহাৰ কৰা কে টি এম মটৰ চাইকেল খনত তালাচী চলোৱাত মটৰ চাইকেল খনৰ একাষে পলিথিনেৰে মেৰিয়াই লুকুৱাই অনা অৱস্থাত কাৰখানাত নিৰ্মিত পইন্ট ২২ পিষ্টল আৰু সঁজীৱ গুলী উদ্ধাৰ হয়।
ধৃত অস্ত্ৰ সৰবৰাহকাৰী যুৱকদ্বয়ে আৰক্ষীৰ জেৰাত প্ৰকাশ কৰা অনুসৰি এই পিষ্টলটো তেওঁ লোকে এজন লোকক দিবৰ কাৰণে লৈ গৈ আছিল। আৰক্ষীয়ে অধিক তথ্য উদঘাটনৰ বাবে ধৃত অস্ত্ৰ ব্যৱসাৰী দুজনক জেৰা অব্যাহত ৰাখিছে।