নিয়মীয়া বাৰ্তা, ২৭ ডিচেম্বৰঃ জন্মদিনৰ আগদিনাই অভিনেতা ছলমান খানক খুঁটিলে সাপে৷ মুম্বাইৰ উপকণ্ঠীয় অঞ্চল পানভেলত নিজৰ পামঘৰত উপস্থিত হৈছিল অভিনেতাগৰাকী৷ নিশাটো এই পামঘৰতে কটাইছিল ছলমানে৷ তাতেই ঘটিল অঘটন৷ ততাতৈয়াকৈ অভিনেতাগৰাকীক লৈ যোৱা হয় নবী মুম্বাইৰ এখন হাস্পতাললৈ৷ হাস্পতালত প্রাথমিক চিকিৎসাৰ পাছত অভিনেতাগৰাকীক অৱশ্যে ঘৰলৈ যাবলৈ দিয়া হয়৷
লক্ষণীয়ভাৱে সাপ আছিল বিষহীন৷ গতিকে অভিনেতাগৰাকীৰ স্বাস্থ্য সুস্থিৰ থকা বুলি চিকিৎসকে ঘোষণা কৰিছে৷ বৰদিনৰ নিশা বন্ধু–বান্ধৱৰ সৈতে পামঘৰৰ বাগিচাত বহি বার্তালাপ কৰি আছিল ছলমানে৷ তেতিয়াই আহি হাতত খোঁটে সাপে৷ আজি অভিনেতাগৰাকীৰ ৫৬সংখ্যক জন্মদিন৷ নিজ পামঘৰত পৰিয়াল–নিকটাত্মীয় আৰু বন্ধু–বান্ধৱৰ সৈতে জন্মদিন উদ্যাপনৰ বাবে এই পামঘৰত উপস্থিত হৈছিল অভিনেতাগৰাকী৷
স্মর্তব্য যে যোৱা বছৰো পানভেলৰ নিজ পামঘৰত জন্মদিন পালন কৰিছিল বলীউডৰ জনপ্রিয় অভিনেতাগৰাকীয়ে৷ ক’ৰোনা মহামাৰীৰ লকডাউনৰ প্রথম সময়ছোৱাতো এই পামঘৰতে কটাইছিল ছলমানে৷ লক্ষণীয়ভাৱে পামঘৰৰ ৰখীয়াক পূর্বেই বহু সাপ থকা বুলি জনাইছিল ছলমানে৷ এই সাপবোৰে কোনো লোকৰ অনিষ্ট কৰিব পাৰে বুলি আশংকাও কৰিছিল অভিনেতাজনে৷ কিন্তু কালি পুৱতিনিশা নিজেই সাপৰ কামোৰৰ সন্মুখীন হ’বলগীয়া হ’ল ছলমান খান৷ অৱশ্যে কালি মাজনিশাৰ পৰা ৫৬সংখ্যক জন্মদিন অভিনেতাগৰাকীয়ে আড়ম্বপূর্ণভাৱে পালন কৰিব ঘোষণা কৰিছে৷ লক্ষণীয়ভাৱে সাপে খোঁটাৰ পাছত সাপডালক ধৰি জংঘলত এৰি দিয়া বুলি এক সংবাদ মাধ্যমক জনাইছে ছলমান খানৰ পিতৃ ছেলিম খানে৷