নিয়মীয়া বাৰ্তা ১৩ মাৰ্চঃ বিটিচি নির্বাচনৰ অধিসূচনা জাৰি কৰাৰ পিছতে নির্বাচনী কুচকাৱাজ আৰম্ভ কৰিছে কোকৰাঝাৰৰ সাংসদ নৱ শৰণীয়া নেতৃত্বাধীন গণ সুৰক্ষা পার্টী আৰু ইয়াৰ সহযোগী সংগঠনসমূহে৷ গণ সুৰক্ষা পার্টীৰ বৃহস্পতিবাৰে প্রথমখন প্রার্থী তালিকা ঘোষণা কৰে৷ দিছপুৰ প্রেছ ক্লাবত এখন সংবাদ মেলত গণ সুৰক্ষা পার্টীৰ নেতা তথা সাংসদ শৰণীয়াই মুঠ ১৮টা সমষ্টিৰ বাবে প্রার্থী তালিকা ঘোষণা কৰে৷ আনহাতে দ্বিতীয়খন প্রার্থী তালিকা অহা ১৫ মার্চত ঘোষণা কৰিব বুলি উল্লেখ কৰি তেওঁ কয়– বিটিচিৰ ৪০টা সমষ্টিতে আমি প্রার্থিত্ব দিম৷ এক ইঞ্চি মাটিও যুঁজ নিদিয়াকৈ এৰি নিদিওঁ৷ ইপিনে বিজেপিয়ে বিটিচি নির্বাচনত অকলে অৱতীর্ণ হোৱা প্রসংগত শৰণীয়াই কয় যে বিজেপিয়ে বিটিচি নির্বাচনত প্রতিদ্বন্দ্বিতা কৰিলেও সকলোৰে পৰা সমান দূৰত্ব বজাই ৰাখিব৷ বিজেপিয়ে গণ সুৰক্ষা পার্টীৰ প্রার্থীৰ জয়ী হোৱা সমষ্টিত প্রার্থী দিছে৷ কিন্তু বিজেপিয়ে অকলে প্রতিদ্বন্দ্বিতা কৰে নে বিপিএফৰ লগত খেলে তাক লৈ গণ সুৰক্ষা পার্টী শংকিত নহয়৷ ইপিনে সংবাদ মেলত সন্মিলিত জনগোষ্ঠীয় সংগ্রাম সমিতিৰ সভাপতি ব্রজেন মহন্তই কয় যে বিটিচিত গণ সুৰক্ষা পার্টীৰ চৰকাৰ হ’লে নৱ কুমাৰ শৰণীয়া বিটিচিপ্রধান হ’ব৷ একেদৰে বিটিচিৰ ৰাইজ পৰিৱর্তনৰ বাবে সাজু হৈছে বুলি উল্লেখ কৰি মহন্তই কয়– বিটিচি নির্বাচনত এইবাৰ আমাৰ জয় হ’ব৷ ইউ পি পি এলৰ সৈতে আমাৰ মূল যুঁজ হ’ব৷ ঘোষিত প্রার্থীসকলঃ অপ্রতীম বৰা (খালিংদুৱাৰ), ডিম্বেশ্বৰ ৰাভা (ধনশিৰি), বাপন ৰাভা (হৰিশিঙা), মুনীন্দ্র ডেকা (শুক্লাই ছেৰফাং), বনমালী ৰাভা (দৰঙাজুলি), তৃষ্ণা মেধি (বাগানপাৰা), খনীন ডেকা (মুছলপুৰ), মৃদুল/সঞ্জয় (কোকলাবাৰী/শুক্লাই), চক্রধৰ দাস (শালবাৰী), সৰস্বতী দাস (মানস ছেৰফাং), বিদ্যুৎ শৰণীয়া (চিৰাং), ৰমেন্দ্র কোচ (কচুগাঁও), পংকজ দাস (যমদুৱাৰ), থানেশ্বৰ ৰাভা (বৌখুংৰি), অর্পণা দাস (কাজলগাঁও), বিজু শংকৰ ৰাভা (ৰৌতা) আৰু নৱ শৰণীয়া (গুৱেবাৰী)৷