নিয়মীয়া বাৰ্তা,৩ ফেব্ৰুৱাৰীঃ আই আই টি গুৱাহাটীৰ ইতিহাস বিভাগৰ অধ্যাপক অৰূপজ্যোতি শইকীয়াক আজি দ্বিতীয়বাৰৰ বাবে জেৰা চলাব নিয়াই । শনিবাৰে অধ্যাপকজনক ৰাষ্ট্ৰীয় অনুসন্ধানকাৰী সংস্থাই চাৰিঘণ্টাজোৰা জেৰা চলোৱাৰ পাচত আজি পুনৰ সোণাপুৰৰ এন আই এ কাৰ্যালয়ত হাজিৰ হ’বলৈ নিৰ্দেশ দিয়া হৈছে অধ্যাপকজনক ।
উল্লেখ্য যে, কাবিৰোধী আন্দোলনৰ সময়ত হিংসাত্মক পৰিৱেশ ৰচনা কৰাৰ অভিযোগত অধ্যাপকজনক মাৰাথান জেৰা অব্যাহত ৰাখিছে নিয়াই । মন্ত্ৰী ড০ হিমন্ত বিশ্ব শৰ্মাই ১৭ ডিচেম্বৰ তাৰিখে সম্বোধন কৰা সংবাদমেলত কা আন্দোলনৰ হিংসাত্মক প্ৰতিবাদ সম্পৰ্কে কেন্দ্ৰীয় চৰকাৰৰ এক সংস্থাৰ অধীনস্থ এজন ব্যক্তি জড়িত বুলি উল্লেখ কৰিছিল । কোনো ব্যক্তিৰ নাম উল্লেখ নকৰাকৈ শিক্ষাৰ ক্ষেত্ৰত জড়িত ব্যক্তিজনে বিশেষকৈ দিছপুৰৰ প্ৰতিবাদৰ আঁৰত হিংসা বিয়পোৱাৰ প্ৰমাণ পোৱা বুলি সংবাদমেলত স্পষ্ট কৰিছিল ।