নিয়মীয়া বাৰ্তা, ২২ ফেব্ৰুৱাৰীঃ বিটিআৰ শান্তি চুক্তিৰ পাচত সমাগত পৰিষদীয় নিৰ্বাচনে উত্তাল কৰি ৰখা বড়োভূমিৰ ৰাজনীতিয়ে নতুন মোৰ লৈছে । সকলো জল্পনা-কল্পনা আৰু বড়ো ৰাজনীতিৰ এক বহু চৰ্চিত সমীকৰণৰ অৱসান ঘটাই কাৰ্যতঃ সক্ৰিয় ৰাজনীতিত অভিষেক ঘটিল শান্তি চুক্তিৰ অন্যতম স্বাক্ষৰকাৰী তথা নিখিল বড়ো ছাত্ৰ সন্থাৰ (এবছু) প্ৰাক্তন সভাপতি প্ৰমোদ বড়োৰ । বিটিচিৰ মুখ্য কাৰ্যবাহী সদস্য তথা বি পি এফৰ মুৰব্বী হাগ্ৰামা মহিলাৰীৰে তীক্ষ্ণ বাকযুদ্ধ অব্যাাহত ৰখা বড়োৱে সংগ ল’লে ইউ জি ব্ৰহ্ম নেতৃত্বাধীন ইউ পি পি এলৰ । চিৰাং জিলাৰ বিজনীৰ নিকটৱৰ্তী লেছিয়া গাঁৱত শুকুৰবাৰৰ পৰা অনুষ্ঠিত ইউ পি পি এলৰ চতুৰ্থ বাৰ্ষিক অধিৱেশনৰ বিয়লি অনুষ্ঠিত প্ৰতিনিধি সভাত এবছুৰ প্ৰাক্তন সভাপতিজনৰ পদাৰ্পণ ঘটে । অকল পদাৰ্পণ কৰাই নহয়, প্ৰতিনিধি সভাত দীৰ্ঘসময় ধৰি তেওঁ বক্তব্য আগবঢ়ায় ৷
ইউ পি পি এলৰ প্রতিনিধি সভাত উপস্থিত হোৱাৰ লগে লগে বড়োৰ সক্রিয় ৰাজনীতিত প্রৱেশৰ বহুচর্চিত বিষয়টো নিশ্চিত হয়৷ এতিয়া মাথোঁ আনুষ্ঠানিকতাহে বাকী৷ বড়োৱে নিজেই ‘নিয়মীয়া বার্তা’ক জানিবলৈ দিয়া মতে, কাইলৈ দিনৰ ভাগত অনুষ্ঠিত হ’বলগীয়া মুকলি সভাত তেওঁ আনুষ্ঠানিকভাৱে যোগদান কৰিব ইউ পি পি এলত৷ উল্লেখ্য যে যোৱা ২৭ জানুৱাৰীত কেন্দ্র–ৰাজ্য চৰকাৰ আৰু এন ডি এফ বিৰ চাৰিওটা গোট–এবছুৰ মাজত বি টি আৰ শান্তি চুক্তি সম্পন্ন হোৱাৰ পাছতে এবছুৰ মজিয়া ত্যাগ কৰিছিল বড়োৱে ৷ লগে লগে তেওঁৰ ৰাজনৈতিক জগতত পদার্পণক লৈ ব্যাপক চর্চা আৰম্ভ হয়৷ বিগত কেইদিনত বড়োভূমিৰ ৰাজনীতিত এই চর্চা তুংগত উঠিছিল৷ অৱশ্যে ইয়াৰ মাজতে বড়োৱে ইউ পি পি এলত যোগদান কৰাটো প্রায় নিশ্চিত হৈ পৰে যদিও আনুষ্ঠানিকতা কেতিয়া সম্পন্ন হয়, তাক লৈ সৃষ্টি হৈছিল উৎকণ্ঠা তথা জল্পনা–কল্পনা৷ অৱশেষত ইউ পি পি এলৰ আজিৰ প্রতিনিধি সভাৰ মজিয়াত ইয়াৰ অৱসান ঘটে৷ ইউ পি পি এলৰ প্রতিনিধি সভাত দিয়া ভাষণত এবছুৰ প্রাক্তন সভাপতিজনে কেইবাটাও গুৰুত্বপূর্ণ মন্তব্য কৰে৷ তেওঁ কয় যে যোৱা ২৭ জানুৱাৰীত চুক্তি স্বাক্ষৰ হৈ যোৱাৰ পাছত প্রায় প্রতিদিনে সংবাদ মাধ্যমত বিভিন্ন বাতৰি প্রকাশ পাই আহিছে৷ বিটিচিৰ মুৰব্বী আৰু তেওঁৰ সোঁৱে–বাঁৱে থকা একাংশই চুক্তিখন বেয়া আখ্যা দি কিবাকিবি কৈ আছে৷ কিন্তু চুক্তিখন সন্দর্ভত মোৰ দৃষ্টিৰে কওঁ যে আমি প্রধানতঃ দুটা কাৰণতে সংগ্রাম কৰোঁ– নিৰাপত্তা আৰু উন্নয়ন লাগে৷ পৃথিৱীৰ যিকোনো প্রান্তত যেতিয়াই দমন হয়, তেতিয়াই আন্দোলন গঢ়ি উঠে ৷ এই আন্দোলনৰ উদ্দেশ্য– নিৰাপত্তা ৷ এতিয়া প্রশ্ন হৈছে– চুক্তিৰ পাছত বিটিচিলৈ নিৰাপত্তা আহিল নেকি? এন ডি এফ বিৰ লগতে গণতান্ত্রিকভাৱে সংগ্রাম অব্যাহত ৰখা এবছুৱে শান্তি চুক্তি স্বাক্ষৰ কৰাৰ লগে লগে বিটিচিত এতিয়া শান্তি স্থাপন হ’ল ৷ যিবোৰ কাৰকৰ কাৰণে নিৰাপত্তাহীনতাৰ সৃষ্টি হয়, সেই কাৰকবোৰ নোহোৱা হৈ গ’লেই শান্তি নিশ্চিত ৷ সুখ, শান্তি বিচৰাসকলক শান্তি চুক্তিয়ে সাহস দিয়াই নহয়, তেওঁলোকে শান্তি চুক্তিখনক সমর্থন কৰিব বুলিও তেওঁ মন্তব্য কৰে ৷ এই প্রসংগতে বি পি এফৰ সভাপতি মহিলাৰীক তীক্ষ্ণ কটাক্ষ কৰে বড়োৱে ৷
তেওঁৰ ভাষ্য– প্রধানমন্ত্রী নৰেন্দ্র মোদীয়ে ইয়ালৈ আহি ক’বলৈ বাধ্য হৈছে যে বিটিচিৰ পৰা অসম–ভাৰতে বহুত শিকিবলগীয়া আছে৷ ইয়াৰ বাবে আমি আনন্দিত হ’ব পাৰোঁ৷ প্রধানমন্ত্রীৰ এনে মন্তব্যৰ পাছত আমাক আৰু বেলেগৰ চার্টিফিকেট নালাগে৷ কোকৰাঝাৰত বহি থকা ডাঙৰীয়াই কি কয়, কি নকয় সেয়া আমাৰ বাবে প্রয়োজনীয় নহয়৷ ৰাষ্ট্রপতি–প্রধানম সংসদৰ মজিয়াত শান্তি চুক্তিৰ কথা উল্লেখ কৰিছে৷ বি টি আৰ চুক্তি ৰূপায়ণ কৰাটো চৰকাৰৰ দায়িত্ব বুলি দোহাৰি তেওঁ কয় যে চুক্তিত সকলো জাতি–জনগোষ্ঠীৰ বাবে কিবা নহয় কিবা আছে৷ শান্তি চুক্তি সম্পাদনৰ পাছত বিটিচিৰ পৰা দুর্নীতিগ্রস্ত আৰু ভ্রষ্টাচাৰী নেতাক বাহিৰলৈ উলিয়াই দিয়াটোকেই দ্বিতীয় যুদ্ধ ৰূপে ঘোষণা কৰে বড়োৱে৷ এই প্রসংগত তেওঁ কয় যে ২০০৯ চনতে আমি দেৱালত লিখিছিলোঁ– আমাক অস্ত্র আৰু হিংসামুক্ত এখন সমাজ লাগে৷ আমি সেই সমাজখন পাবলৈ সক্ষম হ’লোঁ৷ এতিয়া আমাৰ দ্বিতীয় যুদ্ধ হ’ব দুর্নীতিগ্রস্ত আৰু ভ্রষ্টাচাৰী নেতাক বাহিৰ কৰাটো৷ জৱাহৰলাল নেহৰুৱে কল্যাণকামী ৰাষ্ট্রৰ ঘোষণা কৰিছিল৷ বর্তমানৰ প্রধানমন্ত্রীয়ে কৈছে সবকা সাথ সবকা বিকাশৰ কথা৷ আমি এনেধৰণৰ আদর্শৰে আগবাঢ়ি যাব লাগিব৷ তাৎপর্যপূর্ণভাৱে ইউ পি পি এলৰ চতুর্থ বার্ষিক অধিৱেশনৰ আজিৰ প্রতিনিধি সভাখনত উপস্থিত আছিল এন ডি এফ বি (পি)ৰ সভাপতি তথা অন্যতম শান্তি চুক্তি স্বাক্ষৰকাৰী গোবিন্দ বসুমতাৰী৷ দীর্ঘসময় ধৰি সশস্ত্র সংগ্রাম কৰা বসুমতাৰীৰো যে সক্রিয় ৰাজনীতিত পদার্পণ ঘটিব, সেই কথা তেওঁ প্রতিনিধি সভাত দিয়া ভাষণতেই স্পষ্ট হ’ল৷ নিজ ভাষণৰ আৰম্ভণিতে বসুমতাৰীয়ে কয়– বর্তমান মই যিযোৰ সাজ পিন্ধি আছোঁ, সলাব লাগিব৷ দৰকাৰ হ’ব৷ অৱশ্যে এতিয়ালৈ মই সলোৱা নাই৷ কিন্তু সলাম৷ ৰাজনীতি বিষয়টো বেয়া পোৱা বাবেই কলেজত মই ৰাজনীতি বিজ্ঞান লোৱা নাছিলোঁ৷ বড়োলেণ্ড কোনো এটা বিশেষ জনগোষ্ঠীৰ কাৰণে নহয়, বৰঞ্চ সকলো জাতি–জনগোষ্ঠীৰ বাবেই বুলি তেওঁ উল্লেখ কৰে৷ এন ডি এফ বি (পি)ৰ শীর্ষ নেতাজনে শান্তি চুক্তিৰ প্রসংগত এক গুৰুত্বপূর্ণ মন্তব্য কৰি কয় যে শান্তি চুক্তিৰ বাবেই বড়োভূমিত অস্ত্রৰ জনজননি চিৰকালৰ বাবে নাইকিয়া হৈ গ’ল৷ দীর্ঘদিনে ভূটান, ম্যানমাৰ আদিৰ জংঘলত থাকি সংগ্রাম কৰা এন ডি এফ বিৰ সদস্যসকলে নিজৰ ঘৰ–সমাজলৈ ঘূৰি আহিব পাৰিলে৷ উল্লেখ্য যে আজি দুপৰীয়াৰ ভাগত মূল প্রৱেশদ্বাৰৰ ফিটা কাটি ইউ পি পি এলৰ চতুর্থ বার্ষিক অধিৱেশনৰ কার্যসূচীৰ শুভাৰম্ভ কৰে এম চি এল এ গুণেশ্বৰ গয়াৰীয়ে৷ বিয়লি নাম পঞ্জীয়নৰ পাছতে অনুষ্ঠিত হয় প্রতিনিধি সভা৷ আজিৰ প্রতিনিধি সভাত বিভিন্ন দল–সংগঠনৰ বহুকেইজন নেতা–সদস্যই আনুষ্ঠানিকভাৱে ইউ পি পি এলত যোগদান কৰে৷ কাইলৈ দ্বিতীয় দিনা হোৱা পতাকা উত্তোলন আৰু শ্বহীদ তর্পণৰ পাছতেই দুপৰীয়া অনুষ্ঠিত হ’ব মুকলি সভা৷