🔹 তিনিচুকীয়া অভিমুখী নৈশবাছত আৰক্ষীৰ তালাচী
নিয়মীয়া বাৰ্তা, ২৪ ছেপ্টেম্বৰ : আন্তঃৰাষ্ট্ৰীয় ড্ৰাগছ সৰবৰাহকাৰী চক্ৰৰ বিৰুদ্ধে কাৰ্বি আংলং জিলা আৰক্ষীয়ে ধাৰাবাহিক অভিযান চলাই থকাৰ সময়তে যোৱানিশা কাৰ্বি আংলং জিলাৰ বৰপথাৰত আৰক্ষীয়ে এখন নৈশবাছত অভিযান চলাই বুজন পৰিমাণৰ হেৰʼইনসহ এগৰাকী মহিলা সৰবৰাহকাৰীক আটক কৰিবলৈ সক্ষম হয়। প্ৰাপ্ত তথ্য অনুসৰি, যোৱানিশা জিলাখনৰ বৰপথাৰ থানাৰ অন্তৰ্গত খাকৰাজানত আৰক্ষীয়ে চলোৱা নিয়মীয়া তালাচীৰ সময়তে ডিমাপুৰৰ পৰা তিনিচুকীয়া অভিমুখে গৈ থকা এএছ-০১-জেচি-৭৭৫৪ নম্বৰৰ নৈশবাছত তালাচী চলাই এগৰাকী মহিলাৰ জিম্মাৰ পৰা ১৪টা চাবোনৰ বাকচত ১৭৬.৭১ গ্ৰাম হেৰʼইন জব্দ কৰিবলৈ সক্ষম হয়। সৰবৰাহকাৰী মহিলাগৰাকী নাগালেণ্ডৰ ডিমাপুৰৰ নিয়ামজুন মুনিয়েক (২৭) বুলি চিনাক্ত কৰা হৈছে। আৰক্ষীয়ে মহিলাগৰাকীক আটক কৰি তদন্ত অব্যাহত ৰাখিছে। জব্দ হোৱা হেৰʼইনখিনিৰ আন্তঃৰাষ্ট্ৰীয় বজাৰ মূল্য কমেও পোন্ধৰ লাখ টকা।
প্ৰেৰক প্ৰাণদ্বীপ চেতিয়া