চিৰাং জিলাৰ বিজনীৰ বৰলাউগাঁও থেংফাখ্ৰী পথাৰত আজিৰে পৰা তিনিদিনীয়া বিস্তৃত কাৰ্যসূচীৰে আৰম্ভ হৈছে বড়ো সাহিত্য সভাৰ ৬৫ সংখ্যক কেন্দ্ৰীয় বাৰ্ষিক অধিৱেশন। এই লৈ শীতৰ বতৰতো থেংফাখ্ৰী পথাৰ হৈ পৰিছে উদুলি-মুদুলি ৷ কাৰ্যসূচী অনুসৰি, আজি প্ৰথম দিনা তোৰণ, অতিথিশালা, প্ৰদৰ্শনী মঞ্চ, স্বেচ্ছাসেৱক-সেৱিকাৰ শিবিৰ, প্ৰতিনিধি শিবিৰ মুকলি, আলোচনা চক্ৰ আৰু সন্ধিয়ালৈ অনুষ্ঠিত হ’ব বড়ো সাহিত্য সভাৰ প্ৰথম কাৰ্যনিৰ্বাহক সভা ৷
আজি পুৱা ৯ বজাত ড০ মনেশ্বৰ ব্ৰহ্ম সোঁৱৰণী মূল তোৰণ মুকলি কৰে বিটিচিৰ কাৰ্যবাহী সদস্য তথা বড়ো সাহিত্য সভাৰ ৬৫সংখ্যক বাৰ্ষিক অধিৱেশনৰ কাৰ্যকৰী সভাপতি ধীৰাজ বৰগয়াৰীয়ে ৷ ইয়াৰ পাছতে পদ্মলোচন বড়ো সোঁৱৰণী মূল ৰভা মুকলি কৰে চিৰাঙৰ আয়ুক্ত যতীন বৰাই ৷ চানজাৰাং লক্ষেশ্বৰ ব্ৰহ্ম সোঁৱৰণী মূল মঞ্চ মুকলি কৰে বিজনী জিলা বড়ো সাহিত্য সভাৰ প্ৰাক্তন সভাপতি ফুলীচৰণ বসুমতাৰীয়ে ৷ প্ৰতিনিধি গৃহ মুকলি কৰে বিটিচিৰ পৰিষদীয় সদস্য জেমছ বসুমতাৰীয়ে ৷ একেদৰে ল’ৰা-ছোৱালীৰ স্বেচ্ছাসেৱক শিবিৰ আদিৰ লগতে বিনোদ ব্ৰহ্ম সোঁৱৰণী মুকলি বজাৰ মুকলি কৰে বিটিচিৰ পৰিষদীয় সদস্য ধনঞ্জয় বসুমতাৰীয়ে ৷
পুৱা ১১ বজাৰ পৰা প্ৰতিনিধি পঞ্জীয়ন, ইয়াৰ পাছতে অনুষ্ঠিত হয় আলোচনা চক্ৰ আৰু আবেলিলৈ অনুষ্ঠিত হ’ব কবি সন্মিলন ৷ সন্ধিয়া বড়ো সাহিত্য সভাৰ প্ৰথম প্ৰতিনিধি সভাখন মুকলি কৰিব বড়ো সাহিত্য সভাৰ প্ৰাক্তন উপ-সভাপতি গোপীনাথ বৰগয়াৰীয়ে।
নিয়মীয়া বাৰ্তা, বিজনী, ৯ জানুৱাৰী :