নিয়মীয়া বাৰ্তা, ১৭ ফেব্ৰুৱাৰীঃ বিধানসভা নির্বাচনৰ দিন ঘোষণাৰ প্রাক্ক্ষণত কংগ্রেছৰ মহাজোঁটবন্ধনক লৈ সৃষ্টি হোৱা অনিশ্চয়তাৰ বিপৰীতে মিত্রজোঁট অগপ, বিজেপি, ইউ পি পি এলৰ আসন বুজাবুজি প্রায় চূড়ান্ত হোৱাৰ পথত৷ বিশেষকৈ অগপ–বিজেপিৰ আসন ভাগ–বাটোৱাৰা অহা মার্চ মাহৰ আৰম্ভণিতে সম্পন্ন হোৱাৰ পূর্ণ সম্ভাৱনা আছে৷ ইতিমধ্যে আসন বুজাবুজিৰ বিষয়টোৰ সন্দর্ভত ৰাজ্য চৰকাৰৰ জ্যেষ্ঠ মন্ত্রী ড০ হিমন্ত বিশ্ব শর্মাই স্পষ্ট স্থিতি প্রকাশ কৰাৰ পিছত অগপ আৰু বিজেপিৰ শীর্ষ নেতৃত্বৰ মাজত অনুষ্ঠিত হৈ গৈছে কেইবালানিও বৈঠক৷ এই বৈঠকতে উভয় দলে আসন বুজাবুজিৰ ক্ষেত্রত প্রায় ঐকমত্যত উপনীত হৈছে৷
অগপৰ এক শীর্ষসূত্রই প্রকাশ কৰা অনুসৰি আগন্তুক নির্বাচনত আঞ্চলিক দলটোৱে ৪০খন আসনৰ এখন তালিকা ইতিমধ্যে বিজেপিৰ ওচৰত দাখিল কৰিছে৷ উক্ত তালিকাত অগপৰ দখলত থকা ১৪টা সমষ্টিৰ লগতে ২০১৬ চনৰ নির্বাচনত দলটোৱে প্রত্যাহ্বান জনোৱা আন ২২টা সমষ্টিৰ লগতে অগপই জয়ী হোৱাৰ সম্ভাৱনা থকা আন ৪টা সমষ্টিও উল্লেখ কৰা হৈছে৷ এতিয়া সমগ্র বিষয়টো বিজেপিৰ ৰাষ্ট্রীয় আৰু ৰাজ্যিক নেতৃত্বৰ সৈতে আলোচনাৰ পিছত চূড়ান্ত হ’ব৷ উল্লেখ্য যে অসম বিধানসভাৰ নির্বাচনৰ দিন চলিত মাহতে ঘোষণা কৰাৰ পূর্ণ সম্ভাৱনা আছে৷ নির্বাচনৰ দিন ঘোষণাৰ বাবে ইতিমধ্যে নির্বাচন আয়োগৰ এটা দলেও অসমৰ বিভিন্ন সমষ্টি ভ্রমণ কৰি প্রস্তুতিৰ বুজ লৈছে৷ এনে অৱস্থাত ফেব্রুৱাৰী মাহত নির্বাচনৰ দিন ঘোষণা হ’লে মার্চ মাহৰ আৰম্ভণিতে কংগ্রেছ–বিজেপিৰ আসন বুজাবুজি চূড়ান্ত হ’ব৷ আসন বুজাবুজিৰ ক্ষেত্রত বিজেপিৰ ৰাজ্যিক নেতৃত্বৰ লগত অগপৰ নেতৃত্বৰ কেইবালানিও অনানুষ্ঠানিক আলোচনাও ইতিমধ্যে সম্পন্ন হৈছে৷
আনকি শেহতীয়াকৈ মুখ্যমন্ত্রী সর্বানন্দ সোণোৱাল আৰু ড০ হিমন্ত বিশ্ব শর্মাৰ সৈতেও অগপৰ সভাপতি অতুল বৰা আৰু কার্যকৰী সভাপতি কেশৱ মহন্তৰো কেইবালানিও বৈঠক সম্পন্ন হৈছে৷ অগপৰ সূত্রই প্রকাশ কৰা অনুসৰি আসন বুজাবুজিৰ ক্ষেত্রত মুখ্য বিষয়টো হৈছে– উভয় দলৰ দখলত থকা সমষ্টি কিদৰে এৰা–ধৰা কৰা হ’ব৷ এইক্ষেত্রত অগপই যিদৰে ত্যাগ স্বীকাৰ কৰিবলৈ সাজু, তেনেদৰে বিজেপিয়েও দখলত থকা সমষ্টি এৰি দিবলৈ সাজু থাকিব লাগিব৷ ২০১৬ চনৰ নির্বাচনতো উভয় দলে সমষ্টি এৰাধৰাৰ মাজেৰে জয়ী হ’বলৈ সক্ষম হৈছিল৷
সূত্রটোৱে ইয়াকো কয় যে বিজেপিয়ে ইতিমধ্যে অগপৰ দখলত থকা নাহৰকটীয়া, দেৰগাঁও, তেজপুৰ, পাটাছাৰকুছি, কমলপুৰ আৰু পশ্চিম গুৱাহাটী সমষ্টিৰ দাবী তুলিছে৷ একেদৰে অগপয়ো বিজেপিৰ দখলত থকা হাজো, পলাশবাৰী, বিশ্বনাথ, বটদ্রৱা, ৰহা আৰু সৰুপথাৰ সমষ্টিকেইটাৰ দাবী তুলিছে৷ এইক্ষেত্রত বিজেপিয়ে বিচৰা সমষ্টিত শাসকীয় দলটোৰ জয়ৰ সম্ভাৱনা কিমান অথবা অগপই বিচৰা সমষ্টিত আঞ্চলিক দলটোৰ জয়ৰ সম্ভাৱনা কিমান, সেয়া সমীক্ষা তথা পর্যালোচনাৰ অন্ততহে স্পষ্ট হ’ব৷ হয়তো অগপৰ দখলত থকা ৬টা সমষ্টি এৰি দিয়াৰ বিপৰীতে বিজেপিয়ে ৩টা সমষ্টি এৰি দিব পাৰে৷ একেদৰে বিজেপিয়ে ৬টা সমষ্টি এৰি দিয়াৰ বিপৰীতে অগপই তিনিটা সমষ্টি এৰি আসন বুজাবুজি কৰিব পাৰে৷ এই সকলো চূড়ান্ত হ’ব মার্চ মাহত হ’ব লগা আনুষ্ঠানিক বার্তালাপত৷ অৱশ্যে অগপই নিজৰ দখলত থকা সমষ্টিত এইবাৰ প্রার্থী প্রক্ষেপ কৰাৰ বাবে সকলোধৰণৰ প্রস্তুতি চলাই আছে৷
উভয় দলৰে মূল কথা হ’ল– ভোট বিভাজনৰ সুযোগ যাতে কংগ্রেছে ল’ব নোৱাৰে৷ অগপৰ এনে দাবীৰ বিপৰীতে কিন্তু বিজেপিয়ে অগপক ৰহা, বটদ্রৱা, হাজো আৰু বিশ্বনাথ এৰি দিয়াৰ বাবেহে মনস্থ কৰিছে৷ আনকি বটদ্রৱা এৰি দিয়াৰ বিপৰীতে বিজেপিয়ে অগপৰ পৰা বঢ়মপুৰ সমষ্টিৰ দাবী তোলাৰো সম্ভাৱনা আছে৷ বিজেপিৰ দলীয় সূত্রই প্রকাশ কৰা অনুসৰি সংখ্যালঘু ভোট মিত্রজোঁটৰ পক্ষত ৰখাৰ লক্ষ্যৰে বিজেপিৰ দখলত থকা সমষ্টি অগপক এৰি দিয়াৰ চিন্তা–চর্চা কৰা হৈছে৷ তেনে অৱস্থাত সংখ্যালঘু অধ্যুষিত কেইবাটাও সমষ্টি অগপক দিয়াৰ বিপৰীতে বিজেপিয়ে অগপৰ জয়ৰ সম্ভাৱনা কম থকা সমষ্টিত প্রার্থী প্রক্ষেপ কৰিব৷ উল্লেখ্য যে দুয়ো দলৰ মাজত আসন বুজাবুজিক লৈ এতিয়াও চূড়ান্ত সিদ্ধান্ত হোৱা নাই যদিও ৫–১০টা সমষ্টিত বন্ধুত্বপূর্ণ প্রতিদ্বন্দ্বিতাৰ বাবেও দুয়ো দল সাজু হৈছে৷ বিগত নির্বাচনতো কেইবাটাও সমষ্টিত অগপ–বিজেপিৰ বন্ধুত্বমূলক প্রতিদ্বন্দ্বিতাৰে কংগ্রেছ–এআইইউডিএফক্ প্রতিহত কৰিবলৈ সক্ষম হৈছিল৷ একেই প্রক্রিয়াৰে এইবাৰো অগপ–বিজেপিৰ মাজত মধ্য অসম আৰু নামনি অসমৰ কেইবাটাও সমষ্টিত বন্ধুত্বমূলক প্রতিদ্বন্দ্বিতা হোৱাৰ সম্ভাৱনা বৃদ্ধি পাইছে৷