নিয়মীয়া বাৰ্তা, ১৭ ফেব্ৰুৱাৰীঃ ক’ভিডসৃষ্ট জটিল পৰিস্থিতিৰ পিছত ৰাজ্যত এইবাৰ ব্যতিক্রমী ৰূপত অনুষ্ঠিত হ’ল বিদ্যাৰ অধিষ্ঠাত্রী দেৱী সৰস্বতী পূজা৷ ৰাজ্যৰ প্রতিখন শিক্ষানুষ্ঠানত মঙলবাৰে সৰস্বতী দেৱীক বেদীত প্রতিষ্ঠা কৰাৰ পিছতে পূজাৰীসকলে শংখ, ঘণ্টা, মংগলধ্বনি আৰু মন্ত্রোচ্চাৰণেৰে পূজা আৰম্ভ কৰে৷
প্রতিটো মণ্ডপত বৈদিক নিয়ম মতে পূজাৰীয়ে পূজা আৰম্ভ কৰাৰ লগে লগে শিক্ষানুষ্ঠানসমূহ বাগদেৱীৰ বন্দনাৰে মুখৰ হৈ পৰে৷
উল্লেখ্য যে বৈদিক নিয়ম মতে, মাঘ মাহৰ শুল্কা পঞ্চমী তিথিত বিধিসন্মতভাৱে সৰস্বতী পূজা উদ্যাপন কৰা হয়৷ সেই অনুসৰি মঙলবাৰেও ৰাজ্যৰ প্রতিখন শিক্ষানুষ্ঠানত বৈদিক নিয়ম অনুসৰি শিক্ষার্থীসকলে বাগদেৱীৰ আৰাধনা কৰি শৈক্ষিক দিশত আগবাঢ়ি যোৱাৰ বাবে আশিস বিচাৰে৷ উল্লেখ্য যে সৰস্বতী পূজা অহাৰ লগে লগে ছাত্র–ছাত্রীসকলৰ মন–প্রাণ উদ্বেলিত কৰি তোলে৷ সৰস্বতী পূজাৰ দিনটোত নিজকে আকর্ষণীয় ৰূপত সজাবলৈ কিশোৰীৰ পৰা যুৱতীসকলৰ মাজত অঘোষিত প্রতিযোগিতা চলে৷ পূজাৰ প্রাক্ক্ষণত বিউটী পার্লাৰসমূহত এইবাৰো যথেষ্ট ভিৰ হয়৷ ব্যাপক উছাহ–উদ্দীপনাৰ মাজেৰে শিক্ষার্থীসকলে কালি সৰস্বতী পূজা উদযাপন কৰা পৰিলক্ষিত হয়৷
উল্লেখ্য যে শেহতীয়াকৈ ক’ভিডৰ সংক্রমণ হ্রাস পোৱাৰ বাবে উৎসৱ–পার্বণৰ ক্ষেত্রতো যথেষ্ট শিথিলতা প্রদান কৰা হৈছে৷ সেয়েহে শিক্ষক তথা শিক্ষার্থীসকলে উখল–মাখল পৰিৱেশত বাগদেৱীক আৰাধনা কৰে৷ ইফালে, পূজা মণ্ডপ আৰু তোৰণসমূহো এইবাৰ ব্যতিক্রমী আৰু আকর্ষণীয় ৰূপত সজাই তোলা দেখা যায়৷ কোনো শিক্ষানুষ্ঠানত ক’ৰোনা ভাইৰাছৰ আর্হিত পূজা মণ্ডপ সজাই তোলাৰ লগতে কোনো শিক্ষানুষ্ঠানত নির্মাণ কৰে ছেল্ফি জ’ন৷