নিয়মীয়া বাৰ্তা, ৭অক্টোবৰঃ ৰাজ্যসমূহৰ মাজেৰে সৰবৰাহ হৈ থকা ড্রাগ্ছ প্রতিৰোধৰ ক্ষেত্রত অসম চৰকাৰে গ্রহণ কৰি অহা পদক্ষেপক অধিক দৃঢ় কৰাৰ লক্ষ্যৰে কেন্দ্রীয় চৰকাৰে প্রস্তুত কৰিছে এলানি নীতি৷ কেন্দ্রীয় গৃহ মন্ত্রালয়ে গ্রহণ কৰা এনে নীতিক পর্যালোচনা কৰাৰ বাবে আজি গৃহমন্ত্রী অমিত শ্বাহৰ উপস্থিতিত অনুষ্ঠিত হ’ব এক গুৰুত্বপূর্ণ বৈঠক৷ ড্রাগ্ছ সৰবৰাহ আৰু ৰাষ্ট্রীয় সুৰক্ষা শীর্ষক এই বৈঠকখনত কেন্দ্রীয় গৃহমন্ত্রীগৰাকীৰ লগতে উপস্থিত থাকিব উত্তৰ–পূবৰ মুখ্যমন্ত্রী আৰু আৰক্ষী সঞ্চালকপ্রধানসক৷
মুখ্যতঃ উত্তৰ–পূবৰ ড্রাগ্ছ সৰবৰাহ বন্ধ কৰা আৰু ইয়াৰ উৎসসমূহ চিনাক্তকৰণ সন্দর্ভত হ’ব লগা বৈঠকত কেন্দ্রীয় চৰকাৰে ড্রাগ্ছ সৰবৰাহৰ বিৰুদ্ধে গ্রহণ কৰা স্থিতি সম্পর্কত গৃহমন্ত্রী অমিত শ্বাহে বিস্তৃত ব্যাখ্যা আগবঢ়াব৷
উল্লেখ্য যে এই বৈঠকৰ লগত সংগতি ৰাখি আজি গুৱাহাটীৰ নার্ক’টিক্স কণ্ট্ৰ’ল ব্যুৰ (এন চি বি) ৰ দ্বাৰা প্রায় ১১ হাজাৰ কিলোগ্রাম নিচাজাতীয় সামগ্রী ধ্বংস কৰা হ’ব৷ ইয়াৰ উপৰি অসমে ২,৫৩১ কিলোগ্রাম আৰু ত্রিপুৰাই ১১,১৪৪ কিলোগ্রাম হেৰ’ইন, গাঞ্জা, কফ ছিৰাপ আদি কৰি বহু নিচাজাতীয় সামগ্রী ধ্বংস কৰিব৷ আজি সর্বাধিক ২৫ হাজাৰ কিলোগ্রাম নিচাজাতীয় সামগ্রী ধ্বংস কৰা হ’ব৷