নিয়মীয়া বার্তা,২৬ এপ্রিলঃ বিশ্বজুৰি মহামাৰী ক’ভিড–১৯ৰ আতংক ৷ মহাসংকটত বিশ্বৰ মানৱ সভ্যতা ৷ সংক্রমণ ৰোধৰ বাবে দেশত দীঘলীয়া লকডাউন ৷ স্তব্ধ জনজীৱন ৷ ইয়াৰ মাজতে অসমৰ এজন অতি সাধাৰণ যুৱকৰ এখন গ্রন্থই সাত সাগৰ তেৰ নদীৰ সিপাৰে সৃষ্টি কৰিছে আলোড়ন ৷ উল্লেখ্য যে লকডাউনৰ সময়তে ক’ভিড–১৯ সন্দর্ভত গোলাঘাট জিলাৰ ধনশিৰি মহকুমাৰ অন্তর্গত বৰপথাৰ, বছাপথাৰৰ এজন অসমীয়া যুৱকে লিখা গ্রন্থখন প্রকাশৰ দায়িত্ব গ্রহণ কৰিছে সুদূৰ জার্মানীৰ এটা প্রকাশক গোষ্ঠীয়ে ৷ ইপিনে, গ্রন্থখন ৮টাকৈ বিদেশী ভাষালৈ অনুবাদ কৰাৰো অনুমতি বিচাৰিছে যুৱকজনৰ পৰা ৷
গোলাঘাট জিলাৰ বৰপথাৰ মৌজাৰ অন্তর্গত বছাপথাৰ শ্যাম গাঁৱৰ কনছেং শ্যাম নামৰ যুৱকজনে লকডাউনৰ মাজতে লিখি উলিয়াইছে ক’ৰোনা মহামাৰীৰ ৫৩ পৃৃষ্ঠাৰ এখন গ্রন্থ৷ গ্রন্থখনৰ নাম ৰখা হৈছে Globalization and Covid-19 As Cataclysm,Subtitle : The brief history of epidemics & pandemics নামেৰে এখন গ্রন্থ ৷ যিখন গ্রন্থ প্রকাশ কৰাৰ দায়িত্ব গ্রহণ কৰিছে জার্মানীৰ LAMBERT ACCADEMIC PUBLISHING & OMNISCRIPTUM PUBLISHING GROUP–এ ৷ ইতিমধ্যে উক্ত গ্রন্থখন Online যোগে গ্রাহকৰ বাবে মুকলি কৰি দিছে জার্মান প্রকাশন গোষ্ঠীটোৱে ৷ morebooks.shop ত উপলব্ধ হৈছে গ্রন্থখন ৷
লেখক কনছেং শ্যামে ইংৰাজী ভাষাত লিখা উক্ত গ্রন্থখন জার্মান, স্পেনিছ, ৰাছিয়ান, ফান্স, পর্তুগীজ, চেক আৰু পলিচ আদি মুঠ ৭টা ভাষালৈ অনুবাদৰ বাবে প্রকাশক সংস্থাটোৱে অনুমতি লৈছে বুলি জানিবলৈ দিছে লেখক কনছেং শ্যামে ৷ কিতাপখনৰ মূল্য নির্ধাৰণ কৰা হৈছে ৩৯.৯০ ইউৰো ৷ উল্লেখ্য যে ইংৰাজী বিষয়ত স্নাতকোত্তৰ ডিগ্রী লাভ কৰি বর্তমানো নিৱনুৱা হৈ থকা নৱর্ণ শ্যাম আৰু পুষ্পাজ্যোতি শ্যামৰ পুত্র কনছেং শ্যামে তেওঁৰ গ্রন্থখন প্রকাশৰ বাবে ভাৰতীয় প্রকাশক বিচাৰিছিল যদিও ধনৰ অভাৱত দেশীয় প্রকাশক নাপাই অনলাইনৰ জৰিয়তে বিদেশী প্রকাশকৰ সন্ধান কৰি কাষ চাপে জার্মান প্রকাশকৰ ৷ অৱশেষত Omniscriptum publishing group – এ গ্রন্থখন প্রকাশ কৰি অনলাইনত মুকলি কৰি দিছে যদিও পৰিস্থিতি কিছু স্বাভাৱিক হ’লেই কম দিনৰ ভিতৰতে গ্রন্থৰ আকাৰত প্রকাশ পাব উক্ত কিতাপখন ৷ ইপিনে, অসমীয়া ভাষাতো গ্রন্থখন প্রকাশ কৰাৰ আশা পুহি ৰাখিছে লেখক কনছেং শ্যামে ৷