🔹 চিৰাঙত সংবাদ মেল যোগে ঘোষণা চন্দন ব্ৰহ্মৰ
নিয়মীয়া বাৰ্তা, ৮ এপ্ৰিল : বিপিএফ দলৰ অন্যতম শীৰ্ষ নেতা চন্দন ব্ৰহ্মই দল ত্যাগ কৰি ইউপিপিএলত যোগদান কৰিব। চিৰাং জিলাৰ ছাপাগুৰিস্থিত ৰাজ্যৰ প্ৰাক্তন মন্ত্ৰী, বিপিএফৰ প্ৰতিষ্ঠাপক নেতা চন্দন ব্ৰহ্মই অহা ১২ এপ্ৰিলত যোগদান কৰিব ইউ পি পি এল দলত ৷ আজি পুৱা চিৰাং জিলাৰ ছাপাগুৰিস্থিত চিগনেট পাৰ্ক হোটেলত অনুষ্ঠিত এখন সংবাদ মেলত প্ৰাক্তন মন্ত্ৰী ব্ৰহ্মই এই তথ্য সদৰী কৰে। সুদীৰ্ঘ সময় হাগ্ৰামা মহিলাৰী নেতৃত্বাধীন বিপিএফ দলত কাৰ্যনিৰ্বাহ কৰি অহা বিপিএফৰ কেন্দ্ৰীয় উপ-সভাপতি চন্দন ব্ৰহ্মই কোনো অজ্ঞাত কাৰণত যোৱা তিনিটা বছৰে নিষ্ক্ৰিয় ভূমিকা পালন কৰাৰ লগতে মৌন হৈ থকাৰ অন্তত আজিৰ এই ঘোষণাই আগন্তুক দিনত বিপিএফ দলটোৰ যে বৃহৎ ক্ষতি কৰিব, তাৰ উমান পোৱা গৈছে। সংবাদ মেলত চন্দন ব্ৰহ্মই প্ৰকাশ কৰা মতে, ১২ এপ্ৰিলৰ আবেলি চাৰি বজাত চিৰাঙৰ সদৰ কাজলগাঁৱত তেওঁ ইউ পি পি এল দলত যোগদান কৰিব ৷ সিদিনা তেওঁৰ লগতে অন্যান্য কেইবাটাও দল-সংগঠনৰ নেতৃত্ব বহন কৰা শীৰ্ষ পৰ্যায়ৰ যুৱ নেতা আৰু বহুসংখ্যক সমৰ্থকে ইউ পি পি এল দলত যোগদান কৰিব৷ যোগদান সম্পৰ্কত প্ৰাক্তন মন্ত্ৰীজনে সংবাদ মাধ্যমৰ আগত প্ৰকাশ কৰে যে ইউ পি পি এল দলত যোগদান কৰা বিষয়টো এক সময়ৰ আহ্বান ৷ কোনো পূৰ্বচৰ্ত অবিহনে একমাত্ৰ অঞ্চলটোত স্থায়ী শান্তি স্থাপন, উন্নয়ন আৰু প্ৰগতিৰ হকে কাম কৰাৰ স্বাৰ্থত তেওঁ এই সিদ্ধান্ত লোৱা বুলি উল্লেখ কৰে। চন্দন ব্ৰহ্মৰ ইউপিপিএলত যোগদানে প্ৰমোদ বড়ো নেতৃত্বাধীন ইউপিপিএল দলক অধিক শক্তিশালী কৰাৰ লগতে দেশ তথা ৰাজ্যৰ ৰাজনীতিতো ইউপিপিএল দলটোৰ গুৰুত্ব বৃদ্ধি কৰিব বুলি ৰাজনৈতিকভাৱে সচেতন ৰাইজে চৰ্চা কৰা পৰিলক্ষিত হৈছে।
প্ৰেৰক বিপুল কুমাৰ দাস