নিয়মীয়া বার্তা, ১৭ মেঃ সমগ্র দেশতে ক’ৰোনা ভাইৰাছৰ সংক্রমণ ঘটোৱা দিল্লীৰ নিজামুদ্দিন তবলিগী জামাতৰ পৰা কোৱাৰেণ্টাইনত থকা ৩৯জন লোক অসমলৈ উভতি আহিবলৈ সাজু হৈছে৷
অসমৰ হাইলাকান্দি, মৰিগাঁও, নগাঁও জিলাৰ এই লোককেইজনৰ বিষয়ে ইতিমধ্যে দক্ষিণ দিল্লীৰ জিলা দণ্ডাধীশে অসম চৰকাৰক অৱগত কৰিছে৷ অসমৰ হাইলাকান্দি, মৰিগাঁও, নগাঁও আদিৰ লগতে কেইবাখনো জিলাৰ পৰা তবলিগী জামাত মার্কাজত অংশগ্রহণ কৰা ৭৩জন লোকক কোৱাৰেণ্টাইন কৰা হৈছিল৷
ইয়াৰে ১২ মে’ত ১৮ জনক আৰু ১৪ মে’ত ২০জনৰ ছোৱাব টেষ্ট পৰীক্ষা কৰি নিগেটিভ হোৱাত তেওঁলোকক কোৱাৰেণ্টাইনৰ পৰা ঘৰলৈ যোৱাৰ অনুমতি দিয়া হৈছে৷
ইতিমধ্যে দক্ষিণ দিল্লীৰ দণ্ডাধীশ হৰিমন কৌৰে অসমৰ সংশ্লিষ্ট জিলাসমূহৰ সৈতে যোগাযোগ কৰি এই লোকসকলক ওভতাই নিয়াৰ ব্যৱস্থা কৰিবলৈ পত্র প্রেৰণ কৰিছে৷ পত্রত অসমলৈ উভতি আহিব লগা লোকসকলক হোম কোৱাৰেণ্টাইন কৰাৰ বাবেও উল্লেখ কৰা হৈছে৷
মন কৰিবলগীয়া যে বহিঃৰাজ্যৰ পৰা আহিব লগা লোকসকলক ইতিমধ্যে স্থাপন কৰা চৰকাৰী কোৱাৰেণ্টাইন শিবিৰসমূহত স্ক্রীনিং পৰীক্ষাৰ অন্ততহে গৃহলৈ যাব দিয়া হৈছে৷ যিসকলৰ শৰীৰত ক’ৰোনাৰ লক্ষণ দেখা দিছে, সেইসকল লোকক শিবিৰত কোৱাৰেণ্টাইন কৰা হৈছে৷