প্ৰখ্যাত সংগীতশিল্পী লৌ মাজাওক ‘ক্ষমা শান্তি বঁটা’ প্ৰদান 

ভাৰতৰ অন্যতম প্ৰখ্যাত সংগীতশিল্পী লৌ মাজাওক সংগীত আৰু সংস্কৃতি ক্ষেত্ৰত তেওঁৰ অসামান্য অৱদানৰ স্বীকৃতি স্বৰূপে আৰ্ট ভিলেজ, নগাঁৱৰ উদ্যোগত সন্মানজনক ‘ক্ষমা শান্তি বঁটা’ৰে সন্মানিত কৰা হয়।

উক্ত বঁটা প্ৰদান অনুষ্ঠানটো ৪ ফেব্ৰুৱাৰীত নগাঁৱৰ আৰ্ট ভিলেজত এক গাম্ভীৰ্যপূৰ্ণ পৰিৱেশত অনুষ্ঠিত হয়। অনুষ্ঠানটোত বহু বিশিষ্ট ব্যক্তি আৰু কলা-সংস্কৃতিপ্ৰেমী উপস্থিত থাকে। এই উপলক্ষে লৌ মাজাৱে তেওঁৰ কিছুমান জনপ্ৰিয় গান পৰিৱেশন কৰি উপস্থিত দৰ্শক-শ্ৰোতাসকলক মোহিত কৰে আৰু অনুষ্ঠানটো এক স্মৰণীয় সংগীতানুষ্ঠানত পৰিণত কৰে।

অনুষ্ঠানটোত জ্যোতি চিত্ৰাঙ্কন বিদ্যালয়ৰ কিছু ছাত্ৰ-ছাত্ৰীকো তেওঁলোকৰ কৃতিত্বৰ বাবে ৱৰ্ল্ড ফুড ফ’ৰামৰ পৰা লাভ কৰা আন্তঃৰাষ্ট্ৰীয় পৰ্যায়ৰ বঁটা আৰু প্ৰমাণপত্ৰ প্ৰদান কৰা হয়।

উক্ত অনুষ্ঠানত কবি প্ৰয়াগ শইকীয়া, সংগীতশিল্পী ৰঞ্জন বৰুৱা, সংগীতজ্ঞ কৃষ্ণ দুলাল বৰুৱা, অধ্যাপক প্ৰদীপ কুমাৰ বৰা, শংকৰ কৃষ্ণ দাস, কৰবী দেৱী আৰু শিল্পী সুজিত দাস আদিকে ধৰি অন্য বিশিষ্ট ব্যক্তিসকল উপস্থিত থাকে।

এই অনুষ্ঠানটো সংস্কৃতি বিনিময় আৰু কলাৰ উদযাপনৰ এক উল্লেখযোগ্য দৃষ্টান্ত হিচাপে পৰিগণিত হৈ উপস্থিত সকলোৰে মনত এক গভীৰ আৰু স্থায়ী প্ৰভাৱ পেলায়।

ডিজিটেল ডেস্ক, ৭ এপ্ৰিল