বিশেষ বাৰ্তা, ২১ নৱেম্বৰঃ সোণালী কণ্ঠৰে বছৰ বছৰ ধৰি অসংখ্য শ্রোতাক মন্ত্রমুগ্ধ কৰি অহা বলীউডৰ আগশাৰীৰ জনপ্রিয় কণ্ঠশিল্পী লাকী আলীৰ সংগীতানুষ্ঠান উপভোগ কৰাৰ সুযোগ লাভ কৰিলে গুৱাহাটীবাসীয়ে৷ দুই অগ্রণী অনুষ্ঠান উদয়াচল আৰু স্নেহবন্ধনৰ ‘ফাণ্ড ৰেইজাৰ’ অনুষ্ঠানত অংশগ্রহণ কৰি দেওবাৰে সন্ধিয়া লাকী আলীয়ে এটাৰ পাছত আন এটা জনপ্রিয় গীত পৰিৱেশনেৰে মোহাচ্ছন্ন কৰিলে সহস্রাধিক দর্শকক৷ গুৱাহাটীৰ বর্ষাপাৰাৰ অসম ক্রিকেট এছ’চিয়েচনৰ ষ্টেডিয়াম চৌহদত আয়োজন কৰা এই অনুষ্ঠানত চাৰি ঘণ্টাজুৰি সংগীত পৰিৱেশনেৰে লাকী আলীয়ে সৃষ্টি কৰে মায়াময় পৰিৱেশ৷ 
তেওঁৰ গীত শুনি অভিভূত হৈ পৰিল প্রতিগৰাকী উপস্থিত দর্শক৷ গুৱাহাটীত আয়োজন কৰা এই সংগীতানুষ্ঠানত অংশগ্রহণৰ বাবে যোৱা ১৯ নৱেম্বৰতে লাকী আলী উপস্থিত হয়৷ বিমানবন্দৰত তেওঁক বহুসংখ্যক অনুৰাগীয়ে আদৰণি জনায়৷ ইয়াৰ পাছতে কালি সন্ধিয়া ৬ বজাৰ পৰা বর্ষাপাৰাত তেওঁৰ সংগীতানুষ্ঠান ‘লাকী আলী শ্ব’’ আৰম্ভ হয়৷ চাৰি সহস্রাধিক দর্শকে লাকী আলীৰ এই সংগীতানুষ্ঠান উপভোগ কৰি অভিভূত হৈ পৰে৷ বিভিন্ন সময়ত তেওঁৰ গীত শুনি এবাৰ স্বচক্ষে সংগীতজ্ঞগৰাকীৰ অনুষ্ঠান উপভোগ কৰিবলৈ আশাপালি ৰৈ থকা অনুৰাগীয়ে বর্ষাপাৰাত এই সুযোগ লাভ কৰি আনন্দিত হৈ পৰা পৰিলক্ষিত হয়৷ সংগীতানুষ্ঠানৰ সময়ত লাকী আলীৰ লগে লগে তেওঁৰ জনপ্রিয় গীতসমূহ একেলগে সমস্বৰে গাই উপস্থিত দর্শকসকলে সংগীত শিল্পীগৰাকীক উদ্বুদ্ধ কৰি তোলে৷