শিপিনীৰ তাঁতশালত ভমকা ফুলৰ বিহুৱান, নাচনীৰ দুহাতত জেতুকাৰ বোলঃ উছাহে নধৰা হিয়া

নিয়মীয়া বাৰ্তা ১২ এপ্ৰিলঃ বসন্তৰ পৰশত ন–সাজেৰে উদ্ভাসিত হৈ পৰিছে উতলা ফাগুনে লঠঙা কৰা প্রকৃতি৷ কোমল কুঁহিপাতে সেউজ কৰি তুলিছে ধৰা৷ বিনন্দীয়া হৈ পৰা গছ–গছনিৰ আঁৰত লুকাই মাতিছে কুলি–কেতেকীয়ে৷ গছৰ ডালত ফুলিছে কপৌ৷ এনে বিনন্দীয়া পৰিৱেশেই আগলি বতৰা আনিছে অসমীয়াৰ প্রাণৰ আপোন ৰঙালী বিহুৰ৷ চেনেহৰ বিহুটিলৈ মাজত মাথোঁ দুটা দিন৷ বিগত বর্ষত ক’ভিডৰ সংক্রমণৰ বাবে ৰঙালী বিহু উদ্যাপনৰ ক্ষেত্রত বাধাৰ সৃষ্টি হৈছিল যদিও এইবাৰ দুগুণ উৎসাহেৰে চেনেহৰ বিহুটিক আদৰিবলৈ সাজু হৈছে অসমীয়া ৰাইজ৷ শালত ভমকা ফুলৰ বিহুৱানত শেষ পৰশ দিয়াত ব্যস্ত হৈ পৰিছে শিপিনী৷ দুহাতত জেতুকা বুলাই বিহুত হেঁপাহ পলুৱাই এপাক নাচিবলৈ উদ্ভাউল হৈ পৰিছে নাচনী৷ সমান্তৰালভাৱে বিহুৰ দিনা পুৱা আত্মীয়–স্বজনক আপ্যায়ন কৰিবলৈ বিধে বিধে খাদ্য–সামগ্রী প্রস্তুত কৰিবলৈ আখলত ব্যস্ত হৈ পৰিছে গৃহিণী৷

মুঠতে প্রাণৰ আপোন ৰঙালী বিহু উদ্যাপন কৰিবলৈ ৰাজ্যৰ চাৰিওফালে এতিয়া দেখা গৈছে সীমাহীন ব্যস্ততা৷ আকাশে–বতাহে গুঞ্জৰিত হৈছে ঢ়োল–পেঁপাৰ মাত৷ আৰু দুদিন পাছত অর্থাৎ অহা বুধবাৰে ৰাজ্যবাসীয়ে পালন কৰিব গৰুবিহু৷ সেই দিনা গৰুক গা ধুৱাই পৰম্পৰা ৰক্ষা কৰিব অসমবাসীয়ে৷ তাৰ পিছদিনাই উদ্যাপন কৰা হ’ব মানুহ বিহু৷ এইদৰে সাত বিহু পালন কৰিব অসমবাসীয়ে৷ উল্লেখ্য যে ৰাজ্যৰ ভিন্ন প্রান্তত আয়োজন কৰা হৈছে ৰঙালী বিহুৰ কার্যসূচী৷ বিহু হুঁচৰি, বিহুৱতী প্রতিযোগিতাৰ লগতে ঠায়ে ঠায়ে আয়োজন কৰা হৈছে সাংস্কৃতিক অনুষ্ঠানৰ৷ এই অনুষ্ঠানসমূহত গীত পৰিৱেশনৰ বাবে সাজু হৈছে ৰাজ্যৰ শিল্পীসকল৷ ইতিমধ্যে ৰঙালী বিহুৰ অনুষ্ঠান অনুষ্ঠিত কৰাৰ ক্ষেত্রত ৰাজ্য চৰকাৰে কেতবোৰ বিশেষ নীতি–নির্দেশনা নির্ধাৰণ কৰি দিছে৷ নিশা ১১ বজাৰ ভিতৰত বিহুৰ কার্যসূচী সমাপ্ত কৰিবলৈ বিহু কমিটীসমূহক নির্দেশ দিছে চৰকাৰে৷ ইয়াৰ মাজতে প্রান্তে প্রান্তে তিনি–চাৰিদিনীয়াকৈ আয়োজন কৰা হৈছে ৰঙালী বিহুৰ আকর্ষণীয় কার্যসূচী৷ সমান্তৰালভাৱে বিহু মঞ্চত বিহু হুঁচৰি প্রদর্শন কৰিবলৈ সাজু হৈছে বিহু হুঁচৰি দলসমূহ৷ শেষবাৰৰ বাবে আখৰাত ব্যস্ত হৈছে এই বিহু হুঁচৰি দলসমূহৰ লগতে শিল্পীসকল৷