নিয়মীয়া বাৰ্তা, ২২ জুলাইঃ গুৱাহাটী মহানগৰীত যোৱা সোমবাৰৰ পৰা লকডাউন কিছু পৰিমাণে শিথিল কৰিছে যদিও ইয়াৰ সুযোগ গ্রহণ কৰি একাংশ লোকে চৰকাৰৰ কেতবোৰ নীতি–নির্দেশনা উলংঘা কৰি আহিছে৷ মহানগৰ আৰক্ষীয়েও চৰকাৰে বলৱৎ কৰা নীতি–নিদের্শনা উলংঘা কৰা লোকসকলৰ বিৰুদ্ধে কঠোৰ পদক্ষেপ গ্রহণ কৰিছে৷
অসম আৰক্ষীৰ পৰা লাভ কৰা তথ্য মতে, আজিৰ দিনটোত আৰক্ষীয়ে মহানগৰীৰ বিভিন্ন প্রান্তত তালাচী চলাই মুঠ ৭৫খন বাহন জব্দ কৰে৷ ইয়াৰ ভিতৰত ৫৫খন দুচকীয়া বাহন, ৮খন তিনিচকীয়া বাহন, ১১খন চাৰিচকীয়া বাহন আৰু এখন ছচকীয়া বাহন জব্দ কৰে৷ আনহাতে চৰকাৰী নীতি–নির্দেশনা উলংঘা কৰি যান–বাহন চলোৱা লোকক জৰিমনা বিহি আৰক্ষীয়ে কালিৰ দিনটোত ৬৩,০০০ টকা সংগ্রহ কৰে৷ অসম আৰক্ষীৰ পৰা লাভ কৰা তথ্য মতে, যোৱা ৩০ জুনৰ পৰা আজিলৈকে মুঠ ৩,১৩১খন বাহন জব্দ কৰে৷
ইয়াৰ ভিতৰত ২,৫২৩খন দুচকীয়া বাহন, ৭৯খন তিনিচকীয়া বাহন, ৫১৮খন চাৰিচকীয়া বাহন আৰু ১১খন ছচকীয়া বাহন জব্দ কৰে৷ সেইদৰে যোৱা ৩০ জুনৰ পৰা আজিৰ তাৰিখলৈকে লকডাউন উলংঘা কৰাৰ অভিযোগত মহানগৰীত ১৭৮জন লোকক গ্রেপ্তাৰ কৰে৷ লকডাউন উলংঘা কৰা ঘটনা সংক্রান্তত মহানগৰ আৰক্ষীয়ে ৫৭টা গোচৰ ৰুজু কৰে৷ লগতে এই সময়ছোৱাত মাস্ক পৰিধান নকৰাৰ অপৰাধত জৰিমনা বিহি মুঠ ২.২৫ লাখ টকা সংগ্রহ কৰে৷