নিয়মীয়া বাৰ্তা, ৩০ জুলাইঃ অসম–মিজোৰাম সীমান্তৰ লাইলাপুৰত অসম আৰক্ষীৰ ওপৰত কৰা বর্বৰ আক্রমণৰ ঘটনাৰ প্রতিবাদত বৃহস্পতিবাৰে মহানগৰীত উত্তাল প্রতিবাদ সাব্যস্ত কৰে বীৰ লাচিত সেনাই৷ গুৱাহাটীস্থিত মিজোৰাম ভৱনৰ সন্মুখত গামোচা উৰুৱাই প্রতিবাদ সাব্যস্ত কৰে লাচিত সেনাই৷ দিনৰ প্রায় ১১ বজাত লাচিত সেনাৰ সদস্যসকলে হাতে হাতে গামোচা লৈ মিজোৰাম ভৱন ঘেৰাও কৰাৰ লগতে মিজো আৰক্ষী হুচিয়াৰ, সীমা সমস্যা সমাধান কৰক আদি শ্লোগানেৰে অঞ্চলটোৰ অকাশ–বতাহ কঁপাই তোলে৷ লাচিত সেনাৰ সদস্যসকলে মিজোৰাম ভৱনত প্রৱেশ কৰি দখল কৰিবলৈ চেষ্টা কৰে যদিও আৰক্ষীয়ে তেওঁলোকক বাধা প্রদান কৰে৷
মিজোৰাম ভৱনৰ সন্মুখত বেৰিকেড স্থাপন কৰি প্রতিবাদকাৰীসকলক্ বাধা প্রদান কৰে৷ অৱশ্যে বহু সময় ধৰি আৰক্ষীৰ বেহু ফালি লাচিত সেনাৰ সদস্যসকলে প্রতিবাদী কার্যসূচী ৰূপায়ণ কৰে৷ এই প্রতিবাদী কার্যসূচীত অংশগ্রহণ কৰি বীৰ লাচিত সেনাৰ সাংগঠনিক সচিব শৃংখল চলিহাই মূল সমস্যা চিনাক্তকৰণৰ জৰিয়তে এই সমস্যা সমাধান কৰিবলৈ আহ্বান জনায়৷ এই প্রসংগতে তেওঁ কয়– ‘আন্তঃৰাজ্যিক সীমান্তসমূহৰ আটাইৰে ধৰণ–কৰণ, আকৃতি সুকীয়া সুকীয়া৷ অসম–নাগালেণ্ড সীমান্তৰ গোলাঘাট অঞ্চলৰ সমস্যা আৰু বৰাক উপত্যকাৰ জিলাকেইখনৰ সীমা সমস্যা সম্পূর্ণ পৃথক৷ ক’ৰবাত যদি খিলঞ্জীয়াৰ আধিপত্য সীমান্তৰ সিপাৰে থকা প্রতিৱেশী ৰাজ্যৰ আগ্রাসনে নষ্ট কৰিব বিচাৰিছে, আন ক’ৰবাত সন্দেহজনক নাগৰিকৰ উপস্থিতিয়ে পৰিস্থিতি অধিক জটিল কৰি তুলিছে৷ আচলতে মূল সমস্যা চিনাক্ত নকৰাকৈ ৰাজনৈতিক দলসমূহে সীমা সমস্যাটো জীয়াই ৰাখিছে৷ ৰোগৰ কাৰণ চিনাক্ত নকৰাকৈ চিকিৎসা কৰিলে স্থায়ীভাৱে ৰোগীক সুস্থ কৰিব নোৱাৰাৰ দৰে মূল সমস্যা চিনাক্তকৰণ নহ’লে সীমা সমস্যা কেতিয়াও সমাধান নহ’ব৷’
ইফালে বীৰ লাচিত সেনাৰ মুখ্য সচিব ৰণ্টু পানীফুকনে কয় যে অসমীয়া আৰু মিজোৰ সংঘাত হোৱাটো তেওঁলোকে নিবিচাৰে যদিও ৬জনকৈ অসম আৰক্ষী শ্বহীদ হোৱা জোৱানৰ পৰিয়ালে ন্যায় পাব লাগিব৷ মিজোৰামৰ মুখ্যমন্ত্রীয়ে অপৰাধীৰ পক্ষ ল’লে৷ সেয়েহে আমি মিজোৰাম ভৱন দখল কৰিবলৈ আহিছোঁ৷ বৃহস্পতিবাৰৰ কার্যসূচীত অসম আৰক্ষীক আক্রমণ কৰা অপৰাধীসকলক ৰক্ষণাবেক্ষণ দিয়া মিজোৰামৰ মুখ্যমন্ত্রীৰ বিৰুদ্ধেহে৷
ইফালে বীৰ লাচিত সেনাৰ মুখ্য সাংগঠনিক সচিব নৱদীপ বৰাই কয় যে ৬জনকৈ আৰক্ষীৰ আত্মবলিদানক অসম চৰকাৰে সন্মান কৰা উচিত আৰু মিজো দুর্বৃত্তসকলক শাস্তি প্রদান কৰিব লাগিব৷
আনহাতে, লাইলাপুৰৰ ঘটনাত গভীৰ উদ্বেগ প্রকাশ কৰি চি পি আই (এম)–এ বৃহস্পতিবাৰে গুৱাহাটীত এক প্রতিবাদী কার্যসূচী ৰূপায়ণ কৰে৷ এই কার্যসূচীৰ জৰিয়তে বাঁওপন্থী দলটোৱে অসম–মিজোৰামৰ দীর্ঘদিনীয়া সীমা সমস্যাৰ বাবে কেন্দ্র আৰু ৰাজ্য চৰকাৰক জগৰীয়া কৰাৰ লগতে শীঘ্রে দুয়োখন ৰাজ্যৰ সীমা সমস্যাৰ শীঘ্রে শান্তিপূর্ণ স্থায়ী সমাধান কৰিবলৈ দাবী উত্থাপন কৰে৷ এক বিবৃতিত দলটোৰ সম্পাদক দেৱেন ভট্টাচার্যই কয় যে কেন্দ্রীয় গৃহমন্ত্রীৰ উত্তৰ–পূর্বাঞ্চল ভ্রমণৰ এদিন পাছতে দুখন প্রতিৱেশী ৰাজ্যৰ সীমা সংঘর্ষত আৰক্ষীৰ লোক মৃত্যু হোৱা ঘটনা চিন্তনীয় বিষয়৷ এই প্রতিবাদী কার্যসূচীৰ জৰিয়তে বাঁওপন্থী দলটোৱে সমগ্র ঘটনাৰ এক ন্যায়িক তদন্তৰ দাবী উত্থাপন কৰে৷ বৃহস্পতিবাৰৰ প্রতিবাদী কার্যসূচীত প্রবীণ বাঁওপন্থী নেতা হেমেন দাস, জ্যেষ্ঠ চি পি আই (এম) উদ্ধৱ বর্মনকে ধৰি বহুসংখ্যক নেতা আৰু সদস্য উপস্থিত থাকে৷ একে সময়তে আলাপ–আলোচনাৰ মাজেৰে সীমা বিবাদ নিষ্পত্তি কৰিবলৈ আহ্বান জনাইছে চি পি আইৰ অসম ৰাজ্য পৰিষদে৷ এক বিবৃতিত ৰাজ্য পৰিষদৰ সম্পাদক মুনীন মহন্তই লাইলাপুৰত সংঘটিত ঘটনা ইতিহাসতেই নোহোৱা–নোপজা ঘটনা বুলি উল্লেখ কৰি এই সমগ্র ঘটনাৰ এক উচ্চ পর্যায়ৰ তদন্তৰ দাবী উত্থাপন কৰে৷