নিয়মীয়া বাৰ্তা, ২৮ ছেপ্টেম্বৰঃ মহানগৰীৰ ভিন্ন প্রান্তত নাহৰফুটুকী বাঘৰ আতংক অব্যাহত থকাৰ সময়তে এইবাৰ উদ্ধাৰ হৈছে এটা কণমানি লতা মাকৰি বাঘৰ পোৱালি৷ দেওবাৰে পুৱা মহানগৰীৰ উদয়াচলৰ শংকৰ মন্দিৰৰ বাসিন্দা নিজামুদ্দিন ইছলামৰ ঘৰত উদ্ধাৰ হয় এটা লতা মাকৰি বাঘৰ পোৱালি৷
উল্লেখ্য যে নিজামুদ্দিন ইছলাম নামৰ লোকজনৰ পাকঘৰত কালি প্রৱেশ কৰিছিল কণমানি বাঘৰ পোৱালিটো৷ ইয়াৰ পিছতে বাঘৰ পোৱালিটোক উদ্ধাৰ কৰি নিজামুদ্দিন ইছলাম নামৰ লোকজনে লৈ আহে নিউজ লাইভৰ কার্যালয়লৈ৷
পৰৱর্তী সময়ত নিউজ লাইভৰ উদ্যোগত এই বাঘৰ পোৱালিটোক গতাই দিয়া হয় অসম ৰাজ্যিক চিৰিয়াখানাত৷ আনহাতে, উদ্ধাৰ হোৱা এই লতামাকৰি বাঘৰ পোৱালিটোৱে এটা চকুত আঘাত পোৱা বুলি সদৰী কৰে অসম ৰাজ্যিক চিৰিয়াখানাৰ ডি এফ অ’ টেজশ্ব মাৰিস্বামীয়ে৷
লগতে বাঘৰ পোৱালিটো সুস্থ হৈ উঠিলে পুনৰ উদ্ধাৰ হোৱা স্থানত এৰি দিব বুলি মন্তব্য কৰে ডি এফ অ’গৰাকীয়ে৷ কাৰণ মাতৃৰ পৰা আঁতৰত থাকিলে এই লতা মাকৰি বাঘৰ পোৱালিটোক ডাঙৰ–দীঘল কৰিবলৈ যথেষ্ট অসুবিধা হ’ব বুলি উল্লেখ কৰে ডি এফ অ’ টেজশ্ব মাৰিস্বামীয়ে৷
আনহাতে, উদয়াচলৰ আশে–পাশে আন ৪–৫টা লতা মাকৰি বাঘৰ পোৱালি ঘূৰি ফুৰা বুলি সংবাদ মাধ্যমৰ আগত প্রকাশ কৰে নিজামুদ্দিন ইছলামে৷