নিয়মীয়া বাৰ্তা ২৭ নৱেম্বৰঃ ক’ভিড–১৯ৰ এই জটিল পৰিস্থিতিৰ সময়তো নীতি–নির্দেশনা উলংঘাৰে গুৱাহাটী মহানগৰীৰ বিভিন্ন স্থানত থকা বাৰ–ৰেষ্টুৰেণ্টসমূহ্ দুপৰ নিশালৈকে খুলি ৰখাৰ অভিযোগ উত্থাপিত হৈ আহিছে৷
অভিযোগ অনুসৰি স্থানীয় আৰক্ষী আৰু আবকাৰী বিভাগৰ অসাধু বিষয়া–কর্মচাৰীৰে গোপন বুজাবুজি কৰি বাৰ–ৰেষ্টুৰেণ্টসমূহ্ দুপৰ নিশালৈকে খুলি অঞ্চল বিশেষে পৰিৱেশ বিনষ্ট কৰি আহিছে৷ শেহতীয়াকৈ আৰক্ষী প্রশাসনৰ নীতি–নির্দেশনা উলংঘাৰে জু–ৰোডৰ ক্রিষ্টেল বাৰ দুপৰ নিশালৈকে খুলি অঞ্চলটোৰ পৰিৱেশ বিনষ্ট কৰি অহাৰ গুৰুতৰ অভিযোগ উত্থাপন কৰিছে অঞ্চলবাসীয়ে৷ জু–ৰোডৰ ক্রিষ্টেল বাৰত সুৰাপান কৰি একাংশ মাতাল যুৱক–যুৱতীয়ে বিগত প্রায় এমাহ ধৰি জু–ৰোড তিনিআলিত মাজনিশা এক অপ্রীতিকৰ পৰিস্থিতিৰ সৃষ্টি কৰি আহিছে৷ কেৱল ক্রিষ্টেল বাৰতেই নহয় বাৰৰ সমীপতো একাংশ যুৱক–যুৱতীয়ে মুকলিকৈ সুৰাপান কৰি অহা বুলি স্থানীয় ৰাইজে অভিযোগ কৰিছে৷ টহলদাৰী আৰক্ষীৰ সন্মুখতে এই যুৱক–যুৱতীসকলে সুৰাপান কৰি অপ্রীতিকৰ পৰিস্থিতিৰ সৃষ্টি কৰি অহাৰ পিছতো আৰক্ষীয়ে কোনো ব্যৱস্থা গ্রহণ কৰা নাই৷
আৰক্ষী আৰু আবকাৰী বিভাগৰ বিষয়া–কর্মচাৰীৰে থকা গোপন বুজাবুজিৰ বাবে এনেদৰে দুপৰ নিশালৈকে ক্রিষ্টেল বাৰ খুলি ব্যৱসায় চলাই আহিছে৷ ইয়াৰ উপৰি জু–ৰোডৰ আনবক্স নামৰ ৰেষ্টুৰেণ্টখনো দুপৰ নিশালৈকে খুলি ৰখাৰ সুযোগ লৈ একাংশ যুৱক–যুৱতীয়ে ৰেষ্টুৰেণ্টখনক মুকলি বাৰত পৰিণত কৰা বুলি স্থানীয় ৰাইজে অভিযোগ কৰিছে৷ নীতি–নির্দেশনা উলংঘাৰে ব্যৱসায় চলাই অঞ্চলটোৰ পৰিৱেশ বিনষ্ট কৰা ক্রিষ্টেল বাৰ আৰু আনবক্স ৰেষ্টুৰেণ্টৰ বিৰুদ্ধে জিলা উপায়ুক্তক শীঘ্রে ব্যৱস্থা গ্রহণ কৰিবলৈ অঞ্চলবাসী ৰাইজে আহ্বান জনাইছে৷