নিউজ ডেস্ক, ২ এপ্ৰিলঃ প্রাচ্যৰ সৈতে পাশ্চাত্যৰ বিভিন্ন ক্ষেত্রত অমিল আছে৷ কিন্তু বহু বিষয়ত প্রাচ্য আৰু পাশ্চাত্যৰ মানুহৰ দৃষ্টিভংগীৰ মিল দেখিবলৈ পোৱা যায়৷ বস্তুবাদী পৃথিৱীত চমৎকাৰী সফলতা লাভ কৰিছে পাশ্চাত্যই৷ আনফালে, আধ্যাত্মিক চেতনাৰে বিশ্বক পথ দেখুৱাইছে প্রাচ্যই৷ প্রাচ্যৰ এই কৃতিত্বৰ সিংহভাগ ভাৰতৰ৷ ভাৰতত বিভিন্ন জাতি–ধর্মৰ সমন্বয়, বিভিন্ন ভাষা–ভাষীৰ লোকৰ শান্তিপূর্ণ বসবাস আৰু ৰং–বিৰঙৰ সংস্কৃতিয়ে পাশ্চাত্যৰ মানুহক আকর্ষণ কৰে৷ আমেৰিকাৰ এগৰাকী মহিলাও ভাৰতত থকা বৈচিত্র্যৰ মাজৰ ঐক্যত মুগ্ধ হৈ পৰিছে৷ সেইবাবে নিজৰ দেশত নহয়, মহিলাগৰাকীয়ে নিজ সন্তানসকলক ভাৰতত ডাঙৰ–দীঘল কৰিব বিচাৰে৷ বিগত ৪ বছৰ ধৰি দিল্লীত বসবাস কৰি আছে ক্রিষ্টেন ফিচাৰে৷ পেছাত ফিচাৰ এগৰাকী কনটেণ্ট ক্রিয়েটৰ৷ এটা সংস্থাত এই দায়িত্বত আছে মার্কিন মহিলাগৰাকী৷ তিনিটা সন্তান আছে ক্রিষ্টেনৰ৷ অন্য মাতৃৰ দৰে সন্তানক লালন–পালন কৰাৰ ক্ষেত্রত ক্রিষ্টেনো উদ্বিগ্ণ৷ মার্কিন এই মহিলাগৰাকীয়ে বিচাৰে সন্তানসকলৰ মাজত মূল্যবোধ, নৈতিকতাৰ সঠিক বিকাশ ঘটক৷ বিভিন্ন সংস্কৃতিৰ সৈতে সন্তানসকলৰ পৰিচয় হোৱাটো বিচাৰে ক্রিষ্টেনে৷ এই সকলোবোৰৰ বাবে প্রয়োজন ভাল পৰিৱেশৰ৷ ভাৰতত থাকি ক্রিষ্টেনে বুজি উঠিছে যে তেওঁৰ সন্তানসকলে সঠিকভাৱে ডাঙৰ–দীঘল হৈ উঠাৰ উপযুক্ত স্থান হৈছে ভাৰত৷ এইক্ষেত্রত ভাৰততকৈ কোনো ভাল স্থান নাই বুলি মন্তব্য কৰিছে মহিলাগৰাকীয়ে৷ ইয়াৰ বাবে নিজৰ ইনষ্টাগ্রামত বিশেষ কেইবাটাও কাৰণো উল্লেখ কৰিছে মহিলাগৰাকীয়ে৷ পৃথিৱীখনক ভিন্নভাৱে জানিবলৈ নিজৰ সন্তানসকলক ভাৰতে সহায় কৰিছে বুলি মন্তব্য কৰিছে ক্রিষ্টেনে৷ ভাৰতত থাকি ক্রিষ্টেনৰ তিনি সন্তানে বিশ্বৰ বিভিন্ন সমস্যাৰ কথা জানিবলৈ সক্ষম হৈছে৷