প্ৰধানমন্ত্ৰী নৰেন্দ্ৰ মোদীয়ে শনিবাৰে উত্তৰ প্ৰদেশৰ গৌতমবুদ্ধ নগৰৰ জেৱাৰত অৱস্থিত নইদা আন্তঃৰাষ্ট্ৰীয় বিমানবন্দৰৰ প্ৰথম পৰ্যায়ৰ উদ্বোধন কৰে। এই অনুষ্ঠানত উপস্থিত আছিল উত্তৰ প্ৰদেশৰ মুখ্যমন্ত্ৰী যোগী আদিত্যনাথ।
উদ্বোধনী ভাষণত প্ৰধানমন্ত্ৰী মোদীয়ে সমাজবাদী পাৰ্টীক তীব্ৰ সমালোচনা কৰি কয় যে পূৰ্বে সমাজবাদী পাৰ্টী চৰকাৰে নইদাক “লুটৰ এটিএম” হিচাপে ব্যৱহাৰ কৰিছিল। কিন্তু বৰ্তমান বিজেপি চৰকাৰৰ অধীনত নইদাই উত্তৰ প্ৰদেশৰ উন্নয়নৰ এক শক্তিশালী ইঞ্জিন হিচাপে গঢ় লৈ উঠিছে।
তেওঁ লগতে কয় যে জেৱাৰ বিমানবন্দৰৰ পৰা প্ৰায় প্ৰতি দুই মিনিটত এখন বিমান উৰিব, যিয়ে ৰাজ্যখনৰ যোগাযোগ ব্যৱস্থাক অধিক শক্তিশালী কৰিব।
যুৱ সমাজৰ বিষয়ে মন্তব্য কৰি প্ৰধানমন্ত্ৰীয়ে কয় যে এই প্ৰকল্পসমূহে যুৱপ্ৰজন্মৰ ভৱিষ্যতলৈ নতুন দিশ প্ৰদান কৰিব। “আমি বিকশিত উত্তৰ প্ৰদেশ আৰু বিকশিত ভাৰতৰ এক নতুন অধ্যায় আৰম্ভ কৰিছো,” বুলিও তেওঁ কয়।
বিশ্বৰ বৰ্তমান পৰিস্থিতিৰ ওপৰতো গুৰুত্ব আৰোপ কৰি মোদীয়ে কয় যে পশ্চিম এছিয়াত যুদ্ধৰ বাবে বহু দেশত খাদ্য, ইন্ধন আৰু অন্যান্য জৰুৰী সামগ্ৰীৰ সংকট দেখা গৈছে। এনে সময়ত ভাৰতেও সম্পূৰ্ণ শক্তিৰে এই পৰিস্থিতিৰ মোকাবিলা কৰি আছে।
প্ৰধানমন্ত্ৰীয়ে লগতে কয় যে বিমানবন্দৰ কেৱল এটা সুবিধা নহয়, ই উন্নয়নক উৰণ দিয়ে। ২০১৪ চনৰ পূৰ্বে দেশত মাত্ৰ ৭৪টা বিমানবন্দৰ আছিল, যেতিয়া এতিয়া এই সংখ্যা ১৬০ৰো অধিক হৈছে। তেওঁ কয় যে এতিয়া বায়ু সংযোগ ব্যৱস্থা কেৱল ডাঙৰ চহৰত সীমাবদ্ধ নাথাকি সৰু সৰু অঞ্চললৈও বিস্তৃত হৈছে।
ডিজিটেল ডেস্ক, ২৮ মাৰ্চ