তুৰস্ক ভ্রমণৰ সময়ত মৃত্যু পত্নীৰ, মৃতদেহত স্বামীয়ে নাপালে হৃদপিণ্ড

তুৰস্ক ভ্রমণৰ সময়ত মৃত্যু পত্নীৰ, মৃতদেহত স্বামীয়ে নাপালে হৃদপিণ্ড

তুৰস্ক ভ্রমণলৈ গৈ অস্বাভাৱিকভাৱে মৃত্যু হৈছিল এগৰাকী ব্রিটিছ মহিলাৰ৷ ইয়াৰ পাছত দেশলৈ মৃতদেহ ওভতাই আনি স্বামীয়ে জানিব পাৰিলে যে তেওঁৰ পত্নীৰ শৰীৰত হৃদপিণ্ডয়েই নাই তৰুণী পত্নীৰ হৃদপিণ্ড তুৰস্কত কোনে চুৰি কৰিলে, তাক লৈ হাহাকাৰ কৰিবলগীয়া হৈছে স্বামীয়ে৷

এয়া কোনো মানৱ অংগ সৰবৰাহকাৰী চক্রৰ কাম নেকি, তাক লৈ সন্দেহো কৰিছে মহিলাগৰাকীৰ স্বামীয়ে৷ ইতিমধ্যে ঘটনাক লৈ আৰম্ভ হৈছে ৰহস্য৷ বেথ মার্টিন আৰু লুক মার্টিনে তেওঁলোকৰ দুই সন্তানক লৈ তুৰস্কলৈ গৈছিল অৱসৰ বিনোদন কটাবলৈ৷

যোৱা ২৭ এপ্রিলত তেওঁলোকে তুৰস্কলৈ যায়৷ পিছদিনাখন অর্থাৎ ২৮ এপ্রিলত অসুস্থ হৈ পৰে বেথ৷ ২৮ বছৰীয়া বেথক তুৰস্কৰ এখন স্থানীয় হাস্পতালত ভর্তি কৰা হয়৷ হাস্পতালত চিকিৎসাধীন অৱস্থাতে মৃত্যু হয় বেথৰ৷ লুকে দাবী কৰা অনুসৰি তেওঁৰ অসুস্থ পত্নীৰ চিকিৎসাৰ বাবে প্রয়োজনীয় সহযোগিতা আগবঢ়োৱা নাছিল তুৰস্ক প্রশাসনে৷ পৰৱর্তী সময়ত ব্রিটিছ চৰকাৰৰ সৈতে যোগাযোগ কৰি গৃহভূমিলৈ পত্নীৰ দেহ ওভতাই আনিবলৈ সক্ষম হয় লুক৷

কিন্তু পত্নীৰ মৃতদেহ গৃহভূমিলৈ অহাৰ পাছতে চকু কপালত উঠে লুকৰ৷ কাৰণ ব্রিটিছ চৰকাৰৰ তৰফৰ পৰা জনোৱা হয় যে বেথৰ শৰীৰত হূদপিণ্ড নাই৷ এই ঘটনাক লৈ ইতিমধ্যে ব্রিটিছ চৰকাৰে কৈফিয়ৎ তলব কৰিছে তুৰস্ক প্রশাসনক৷ তুৰস্কৰ স্বাস্থ্য মন্ত্রালয়ে এক বিবৃতি জাৰি কৰি বেথৰ মৃত্যু শৰীৰৰ কেইবাটাও অংগ বিকল হৈছিল বুলি দাবী কৰিছে যদিও মৃতদেহত হূদপিণ্ড নথকা ঘটনাটোক অস্বীকাৰ কৰিছে৷