নিয়মীয়া বাৰ্তা, ১০ জানুৱাৰীঃ চুবুৰীয়া ৰাজ্য পশ্চিমবংগৰ কোচবিহাৰ জিলাৰ দোৰাদাব্রী বিএছএফ কেম্প এলেকাৰ বিএছএফে যোৱানিশা সীমান্তৰ কাষৰ পৰা নগদ ধন, ড্রাকসহ বৃহৎ পৰিমাণৰ গাঞ্জা জব্দ কৰে৷
উল্লেখ্য যে ৰাজ্যখনৰ ভাৰত–বাংলাদেশ সীমান্তৰ দোৰাদাব্রী বিএছএফ কেম্প এলেকাৰ দায়িত্বত থকা ১৪০নং বিএন বিএছএফ বাহিনীয়ে যোৱানিশা প্রায় ৯বজাত সীমান্ত পথৰ কাষত প্রতিদিনৰ দৰে তালাচী চলাবলৈ ধৰে৷ সেই সয়মত আৰ জে–১৮ জি বি–২৯৬০ নম্বৰৰ এখন ড্রাকত বিএছএফে তালাচী চলাই ড্রাকখনৰ পৰা ৪৩০ কেজি গাঞ্জা, নগদ ৪৯,৯৯০ টকা আৰু ড্রাকখন জব্দ কৰে৷
আনহাতে, বিএছএফে ড্রাকচালকসহ ড্রাকত থকা আন এজন লোকক কৰায়ত্ত কৰে৷ ধৃত লোক দুজন ক্রমে ৰাজস্থানৰ ঝুনঝুনু জিলাৰ ৰাদমালৰামৰ পুত্র নাৰাং লাল আৰু বুন্দি জিলাৰ ৰাম কিষাণৰ পুত্র সৰদাৰ সিং বুলি জানিব পৰা গৈছে৷
সীমান্ত সুৰক্ষা বাহিনীয়ে দুয়োকে গাঞ্জা, নগদ ধন, ড্রাকসহ আটক কৰি কোচবিহাৰ আৰক্ষীক গতাই দিয়ে৷ আৰক্ষীয়ে ইতিমধ্যে দুয়োকে গ্রেপ্তাৰ কৰি জে’ললৈ প্রেৰণ কৰা বুলি জানিব পৰা গৈছে৷