নিয়মীয়া বাৰ্তা, ১৯ নৱেম্বৰঃ লাডাখৰ সীমান্তত মাইনাছ ৪০ ডিগ্রী চেলছিয়াছত কর্মৰত সেনা জোৱানৰ জীৱন যাপনৰ সুবিধা বৃদ্ধিৰে আধুনিক উষ্ণ তম্বু স্থাপন কৰা হৈছে৷ চীনক প্রতিহত কৰিবলৈ লাডাখ সীমান্তত মোতায়েন হৈ থকা সেনাৰ অত্যন্ত শীতত কর্তব্যত অসুবিধাৰ প্রতি লক্ষ্য ৰাখি এই উষ্ম তম্বু স্থাপন কৰা হৈছে বুলি সেনাৰ বিবৃতিত প্রকাশ৷
নৱেম্বৰৰ পিছত লাডাখ সীমান্তত ৪০ ফুটলৈকে বৰফৰ স্তূপ বৃদ্ধি হোৱাৰ লগতে –৩০ৰ পৰা ৪০ ডিগ্রীলৈকে উষ্ণতা নিম্নগামী হয়৷ এই সময়ছোৱাত সীমান্তৰ প্রহৰী সেনা জোৱানে পহৰা দিয়াৰ লগতে জীৱন যাপন কৰাটো অত্যন্ত কষ্টসাধ্য হৈ পৰে৷
আমেৰিকা যুক্তৰাষ্ট্রৰ সৈতে লজিষ্টিকছ সমর্থন ভাৰতে লাভ কৰাৰ পিছতে দেশখনৰ পৰা ১৫ হাজাৰতকৈও অধিক এক্সটেনডেড ক’ল্ড ৱেডাৰ ক্লথিং ছিষ্টেম (ইচিডব্লিউচিএছ) ছেট আমদানি কৰা হৈছে৷ আমেৰিকা যুক্তৰাষ্ট্রৰ সৈতে লজিষ্টিকছ এক্সছেঞ্জড মেম’ৰেণ্ডাম অৱ এছ’চিয়েচন (এলইএম’এ) ২০১৬ চনত স্বাক্ষৰিত হোৱাৰ পিছতে ভাৰতে এনে সুবিধা লাভ কৰিছে৷
লক্ষণীয় যে যোৱা ১৫ জুনত লাডাখৰ গালৱান উপত্যকাত চীনা সৈন্যৰ হাতত ২০ ভাৰতীয় জোৱান শ্বহীদ হোৱাৰ পিছতেই সীমান্তত এতিয়ালৈকে দুই দেশৰ মাজত উত্তেজনা চলি আহিছে৷ এই উত্তেজনা অব্যাহত থকাৰ সময়তে নতুন দিল্লীয়ে সীমান্তত সেনাৰ সুবিধাৰ বাবে আন্তঃগাঁথনি উন্নীত কৰাৰ লগতে সেনাক শক্তিশালী কৰাত অধিক গুৰুত্ব দিছে৷
সেইমর্মেই লাডাখ সীমান্তত কর্মৰত জোৱানৰ জীৱন সচ্ছল কৰাৰ বাবে আধুনিক উষ্ম তম্বু স্থাপন কৰিছে৷ ইপিনে, জম্মু–কাশ্মীৰৰ কুপৱাৰা জিলাৰ এল’চিত সেনাৰ নিৰীক্ষণ চকী হিমস্খলনৰ প্রভাৱ পৰে৷ হিমস্খলনৰ ফলত এজন সেনা জোৱান নিহত হোৱাৰ লগতে দুজন আহত হয়৷ জম্মু–কাশ্মীৰ দুর্যোগ ব্যৱস্থাপনাৰ তথ্য অনুসৰি কুপৱাৰা জিলাৰ ৰোচন প’ষ্ট হিমস্খলনৰ কবলত পৰে৷
ততালিকে তিনিজন সেনা জোৱানক উদ্ধাৰ কৰি চিকিৎসালয়লৈ নিয়ে যদিও এজনৰ মৃত্যু ঘটে আৰু বাকী দুজন চিকিৎসাধীন হৈ আছে৷ মৃত জোৱানজনক ৭ ৰাষ্ট্রীয় ৰাইফলছৰ ৰাইফল মেন নিখিল শর্মা (২৫) বুলি চিনাক্ত কৰা হৈছে৷ আহত দুজন হৈছে ৰমেশ চান্দ আৰু গুৰবিন্দৰ সিং৷