নিয়মীয়া বাৰ্তা, ২১ মাৰ্চঃ পশ্চিমবংগৰ বিধানসভা নির্বাচনৰ প্রথম পর্যায়ৰ ভোটগ্রহণক লৈ ৰাজ্যখনত প্রচাৰ তুংগত উঠিছে৷ ইতিমধ্যে প্রধানমন্ত্রী মোদীয়ে পুৰুলিয়াত নির্বাচনী সভাত অংশ লোৱাৰ পাছত পুনৰ খড়গপুৰত এক বিশাল সমাৱেশ সম্বোধন কৰে৷ বংগত এইবাৰ বিজেপিৰ চৰকাৰ নিশ্চিত বুলি উল্লেখ কৰি প্রধানমন্ত্রী মোদীয়ে মমতা বেনার্জী নেতৃত্বাধীন তৃণমূল কংগ্রেছ চৰকাৰক কঠোৰ ভাষাৰে সমালোচনা কৰে৷
ৰাজ্য চৰকাৰক আক্রমণৰ লক্ষ্য কৰি প্রধানমন্ত্রী মোদীয়ে কয়– যোৱা শুকুৰবাৰে হোৱাটছএপ আৰু ইনষ্টাগ্রাম প্রায় ৫৫ মিনিটৰ কাৰণে মন্থৰ হ’ল৷ কিন্তু পশ্চিমবংগত বিগত ৫০–৫৫ বছৰৰ কাৰণে বিকাশ পিছুৱাই গ’ল৷ বংগবাসীক আচল পৰিৱর্তনৰ নিশ্চিতি দি প্রধানমন্ত্রী মোদীয়ে কয়– বংগত বিজেপি ক্ষমতাত আহিলে বিজেপিয়ে বিগত ৭০ বছৰে চলাই থকা লুটপাত বন্ধ কৰিব আৰু প্রকৃত পৰিৱর্তন আনিব৷ ৫ বছৰৰ কাৰণে বিজেপিক সুযোগ দিবলৈ আহ্বান জনাই প্রধানমন্ত্রী মোদীয়ে কয় যে ৰাজ্যবাসীয়ে ভুগি থকা সমস্যাবোৰ তেওঁলোকে সমাধান কৰিব৷ ৰাজ্যখনৰ কাৰণে তেওঁলোকৰ জীৱন সমর্পিত কৰিব৷
উল্লেখ্য যে পশ্চিমবংগৰ শাসকীয় তৃণমূল কংগ্রেছ আৰু কেন্দ্রত শাসনাধিষ্ঠিত বিজেপিৰ মাজত এইবেলি বিধানসভা নির্বাচনত তুমুল প্রতিদ্বন্দ্বিতা হোৱাৰ সম্ভাৱনা প্রকট হৈছে৷ এফালে, মমতা বেনার্জীয়ে পুনৰবাৰ ক্ষমতাত অধিষ্ঠিত হোৱাৰ বাবে জোৰদাৰ প্রচাৰ চলাইছে৷
আনপিনে মমতাক উৎখাত কৰিবলৈ বিজেপিয়ে সর্বশক্তি প্রয়োগ কৰিছে৷