নিয়মীয়া বাৰ্তা, ২০ এপ্ৰিলঃ তামিলনাডুত ক’ভিড–১৯ সংক্রমণ বৃদ্ধি পোৱাৰ পৰিপ্রেক্ষিতত চৰকাৰে ২০ এপ্রিলৰ পৰা কেইবাটাও নিষেধাজ্ঞা জাৰি কৰাৰ লগতে নিশা ১০ বজাৰ পৰা পুৱা ৪ বজালৈ সান্ধ্য আইন বলৱৎ কৰিছে৷ তদুপৰি দেওবাৰে সম্পূর্ণ লকডাউন ঘোষণা কৰিছে৷ ইয়াৰ সমান্তৰালকৈ চেন্নাইৰ উদ্যান, সাগৰৰ তীৰ আদি বন্ধ ঘোষণা কৰাৰ লগতে ব্যৱসায়িক প্রতিষ্ঠান, শাক–পাচলি বজাৰকে ধৰি দোকান–পোহাৰ খোলাত প্রতিবন্ধকতা জাৰি কৰিছে৷
চেন্নাই কর্প’ৰেচনে প্রকাশ কৰা মতে ক’ভিড–১৯ আক্রান্তৰ সংখ্যা বৃদ্ধি পোৱাৰ পৰিপ্রেক্ষিতত ব্যৱসায়িক প্রতিষ্ঠান, বাৰ–ৰেষ্টুৰেণ্ট, শাক–পাচলি বজাৰ, চৰকাৰী বিপণীসমূহ নিশা ৯ বজালৈ খোলা থাকিব৷ তদুপৰি দোকানসমূহত এটা সময়ত মাত্র ৫০ শতাংশ গ্রাহকহে প্রৱেশৰ অনুমতি দিব লাগিব৷ এই সময়ছোৱাত গ্রাহক–দোকানী সকলোৱে মাস্ক পৰিধান কৰাৰ লগতে সামাজিক দূৰত্ব বর্তাই ৰাখিব লাগিব৷ চৰকাৰে গ্রহণ কৰা কঠোৰ নির্দেশনাৱলী আৰু নৈশ সান্ধ্য আইনৰ পিছত ৰাজ্যখনত পূর্ণাংগ লকডাউনৰ শংকাত প্রব্রজিত শ্রমিকসকল নিজ গৃহাভিমুখী হৈছে৷
তামিলনাডুৰ ৰে’ল ষ্টেচনসমূহত বহিঃৰাজ্যগামী লোকৰ সংখ্যা বর্ধিত হৈছে৷ অলপতে বিধানসভা নির্বাচন অনুষ্ঠিত হৈ যোৱা তামিলনাডুত আক্রান্তৰ পৰিমাণ বৃদ্ধি পাই থকাৰ সমান্তৰালকৈ কেৰালাতো আক্রান্তৰ সংখ্যা বর্ধিত হৈছে৷ ৰাজ্যখনৰ পৰাও প্রব্রজিত শ্রমিকসকল গৃহাভিমুখী হৈছে৷ লক্ষণীয় যে ভাৰতত ক’ভিড–১৯ৰ দ্বিতীয় জোৱাৰে সংহাৰী ৰূপ লোৱাৰ পিছতে বিদেশী ৰাষ্ট্রসমূহে বিভিন্ন ব্যৱস্থা গ্রহণ কৰিছে৷ হংকঙে ভাৰতগামী সকলো বিমানসেৱা বাতিল কৰিছে৷
অসামৰিক বিমান পৰিবহণ কর্তৃপক্ষই প্রকাশ কৰা মতে অহা ২০ এপ্রিলৰ পৰা ৩০ মে’লৈ ভাৰতলৈ যাবলগীয়া সকলো বিমান হংকঙে বাতিল কৰিছে৷ আনহাতে হংকং ভ্রমণ কৰা সকলো বিমানযাত্রীৰে ক’ভিড নিগেটিভ আৰটিপিচিআৰ ফলাফল আৱশ্যক আছে বুলি ঘোষণা কৰিছে৷ ভাৰতৰ লগতে পাকিস্তান আৰু ফিলিপাইনছলৈ যাবলগীয়া সকলো বিমান সেৱা বাতিল কৰিছে৷ চলিত মাহত দুখন ভিষ্টাৰা বিমানৰ ৫০জন যাত্রীৰ ক’ভিড পজিটিভ হোৱাৰ পিছতে এই সিদ্ধান্ত গ্রহণ কৰিছে৷