নিউজ ডেস্ক,১৪ নৱেম্বৰঃ অৰুণাচল প্ৰদেশৰ পূব চিয়াং জিলা আৰু নামনি ডিবাং ভেলী জিলা দুখনৰ মাজেৰে বৈ যোৱা চিচিৰি নৈৰ ওপৰত নিৰ্মাণ কৰা বহুচৰ্চিত দলংখন শুকুৰবাৰে মুকলি কৰা হ’ব । প্ৰদেশখনৰ পাচিঘাট আৰু ৰঙিয়াৰ মাজত অৱস্থিত নৱনিৰ্মিত দলংখন দেশৰ প্ৰতিৰক্ষা মন্ত্ৰী ৰাজনাথ সিঙে উদ্বোধন কৰিব বুলি এক চৰকাৰী সূত্ৰই জানিবলৈ দিছে । কেন্দ্ৰীমন্ত্ৰীজনৰ লগতে অৰুণাচল প্ৰদেশৰ মুখ্যমন্ত্ৰী , বিজেপিৰ ৰাজ্যিক সভাপতি তথা সাংসদ তাপিৰ গাৱসহ বহুকেইজন বিধায়কে উদ্বোধনী অনুষ্ঠানত ভাগ ল’ব । সুদীৰ্ঘ ১২ বছৰত নিৰ্মাণ সম্পূৰ্ণ হোৱা ২০০ মিটাৰ দৈৰ্ঘ্যৰ দলংখন নিৰ্মাণ কৰিছে সীমান্ত পথ নিৰ্মাণ সংস্থা ব্ৰাহ্মাংক ডিভিজনে । দলংখন নিৰ্মাণ নোহোৱা বাবেই ৰাজ্যখনৰ দাম্বুক , তেজু, নামচাই, ৰয়িং আদি ঠাইলৈ যাবৰ বাবে অসমৰ ধেমাজি, ডিব্ৰুগড় আৰু তিনিচুকীয়া জিলাৰ মাজেদি প্ৰায় ৮-১০ ঘণ্টা সময়ৰ প্ৰয়োজন হৈছিল । বিশেষকৈ পূব আৰু পশ্চিম অৰুণাচলৰ বাসিন্দাসকলক দলংখনে বহু পৰিমাণে সকাহ দিব । পূব চিয়াং জিলাৰ মেব’ মহকুমাৰ ৱাহালি (মিডি) গাঁৱৰ এলেকাত অৱস্থিত চিচিৰি নৈৰ দলংখন হোৱাত কেৱল অৰুণাচল প্ৰদেশৰ জনসাধাৰণৰ সুবিধা হ’ব তেনে নহয় । অসমকে ধৰি দেশৰ প্ৰতিৰক্ষাৰ ক্ষেত্ৰতো যথেষ্ট সুবিধা হ’ব , বিশেষকৈ ১৯৬২ ৰ চীনা যুদ্ধৰ সময়ত চীনা সৈন্যই সহজে আগ্ৰাসন কৰা পৰিস্থিতিৰ পুনৰ উদ্ভৱ হ’লে ভাৰতীয় সেনাই নিয়ন্ত্ৰণ কৰাত সহায় হ’ব । উল্লেখ্য যে, দলংখন মুকলিৰ লগতে আন কেবাটাও কাৰ্যসূচী লৈ প্ৰতিৰক্ষা মন্ত্ৰী ৰাজনাথ সিঙ ১৫ নৱেম্বৰ ( শুকুৰবাৰে )ত অৰুণাচল প্ৰদেশত উপস্থিত হ’ব ।