সেনাৰ নাম লৈ অৰুণাচলী সুৰাৰ বৃহৎ চোৰাং কাৰোবাৰ

নিয়মীয়া বাৰ্তা, ২৫ নৱেম্বৰঃ অৰুণাচলী সুৰাৰ কোটিটকীয়া চোৰাং ব্যৱসায়ৰ এটাৰ পাছত এটা বিস্ফোৰক তথ্য শেহতীয়াকৈ পোহৰলৈ আহিছে । নাগালেণ্ড আবকাৰী বিভাগৰ তথ্যৰ পৰা ওলাই পৰিছে চোৰা সুৰা সাম্ৰাজ্যৰ বহু গোপন কাহিনী । নাগালেণ্ড আবকাৰী বিভাগে জনোৱা মতে লাগালেণ্ডত কৰ্মৰত সোনা আৰু অৰ্ধসামৰিক বাহিনীৰ বাবে ২০১৮ ৰ জানুৱাৰীৰ পৰা ২০১৯ ৰ জানুৱাৰী পৰ্যন্ত সুৰাৰ প্ৰয়োজন আছিল মুঠ ১৩,৯৩২ কাৰ্টুন । কিন্তু ইয়াৰ বিপৰীতে চৰকাৰী তথ্য মতে যোগান ধৰা হৈছিল ১৫,৫৯৭ কাৰ্টুন । নাগালেণ্ড আবকাৰী বিভাগৰ মতে সেনাবাহিনীত প্ৰতিমাহে ১,০৭১ কাৰ্টুন সুৰাৰ প্ৰয়োজন হয় । কিন্তু বাস্তৱত ইয়াৰ প্ৰায় এশ গুণ অধিক সুৰা এদিনতে অসমৰ মাজেৰে নাগালেণ্ডলৈ সৰবৰাহ কৰা হয় । উল্লেখ্য যে প্ৰাপ্ত অভিযোগ মতে এই বিশাল সুৰা সাম্ৰাজ্যৰ গুৰি ধৰিছে দুজন অনা-অসমীয়া ক্ৰমে বীৰা সিং আৰু কমলজিৎ সিঙে সেনাৰ পাৰ্মিট লৈ নাগালেণ্ডলৈ অৰুণাচলী সুৰা চালান দি আহিছে । অবৈধ সুৰা ব্যৱসায়ীৰ এই গোপন কাহিনী ফাদিল হোৱাৰ পাছত দুৰ্নীতিৰ বিৰুদ্ধে শূন্য সহনশীল চৰকাৰেখনে কি ব্যৱস্থা গ্ৰহণ কৰে সেয়া হ’ব লক্ষণীয় ।