নিয়মীয়া বাৰ্তা, ১৪ মাৰ্চঃ বাক্সাৰ শিমলাগুৰি আৰক্ষী চকীৰ অন্তর্গত আঠিয়াবাৰী গাঁৱৰ পথাৰৰ পৰা আজি উদ্ধাৰ হয় এটি মৃতদেহ৷ মৃতদেহটো ড০ মাধুর্য বৰাৰ বুলি চিনাক্ত কৰা হৈছে৷ সৰভোগৰ বৰনগৰ কলেজৰ সহযোগী অধ্যাপক হিচাপে কর্মৰত আছিল ড০ মাধুর্য বৰা৷ যোৱা শিৱৰাত্রিৰ নিশাৰ পৰাই নিৰুদ্দেশ হৈ আছিল ড০ মাধুর্য বৰা৷ মৃতদেহটোৰ শৰীৰত আঘাতৰ চিন নাই যদিও কাষত এচিডজাতীয় দ্রব্য উদ্ধাৰ হৈছে৷
মৃত অধ্যাপকগৰাকীৰ ঘৰ লখিমপুৰ জিলাৰ ঢ়েকীয়াজুলিৰ বিষ্ণুপুৰত৷ তেওঁ বিগত ২০১৯ চনৰ পৰা বৰপেটাৰোডত ভাৰাঘৰত থাকি সৰভোগৰ বৰনগৰ কলেজত ৰসায়ন বিজ্ঞান বিষয়ত সহযোগী অধ্যাপক হিচাপে কাম কৰিছিল৷ তদন্ত আৰক্ষীয়ে অব্যাহত ৰাখিছে৷ অতি মেধাৱী অধ্যাপক ড০ মাধুর্য বৰাৰ মৃতদেহ উদ্ধাৰ হোৱাত বৰনগৰ মহাবিদ্যালয়ৰ শিক্ষক গোটৰ লগতে ছাত্র–ছাত্রীসকল শোকত ভাগি পৰিছে৷ পিছত শিমলাগুৰি আৰক্ষীয়ে ড০ মাধুর্য্য বৰাৰ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে বৰপেটা ফখৰুদ্দিন আলী আহমেদ চিকিৎসা মহাবিদ্যালয়লৈ প্রেৰণ কৰে৷