বিশেষ বার্তা, ১২ ছেপ্টেম্বৰঃ গুৱাহাটী মহানগৰীক স্মার্ট চিটী হিচাপে গঢ়ি তোলাৰ বাবে চৰকাৰে বিভিন্ন পদক্ষেপ গ্রহণ কৰিছে যদিও স্মার্ট চিটীৰ সপোন বাস্তৱত কেতিয়া পৰিণত হ’ব সেয়া এক সাঁথৰ হৈ পৰিছে৷ গুৱাহাটী স্মার্ট চিটী প্রকল্পৰ অধীনত ইতিমধ্যে ৰাজকোষৰ কোটি কোটি টকা ব্যয় কৰি মহানগৰখনত বিভিন্ন আঁচনিৰ কামৰ আধাৰশিলা স্থাপন কৰাৰ লগতে ইতিমধ্যে ৰূপায়ণ কৰা কেইবাটাও স্মার্ট চিটীৰ প্রকল্প প্রহসনত পৰিণত হৈছে৷ বিশেষকৈ গুৱাহাটী স্মার্ট চিটী প্রকল্পৰ অধীনত ৰূপায়ণ কৰা বায়’ টয়লেটসমূহ সম্পূর্ণৰূপে ব্যৱহাৰৰ অনুপযোগী হৈ পৰিছে৷ বিভাগীয় কর্তৃপক্ষৰ চৰম অৱহেলাৰ বাবেই কোটি কোটি টকা ব্যয় সাপেক্ষে মহানগৰীৰ বিভিন্ন স্থানত ২০১৮ চনত স্থাপন কৰা ৩০টা বায়’ টয়লেটৰ অধিকাংশই বন্ধ হৈ পৰিছে৷ স্মার্ট চিটী প্রকল্পৰ অধীনত নির্মাণ কৰা বায়’ টয়লেট সমূহত বিদ্যুৎ সংযোগ বিচ্ছিন্ন কৰাৰ লগতে চোৱা–চিতাৰ দায়িত্বত থকা প্রতিষ্ঠানটোৰ চূড়ান্ত গাফিলতিৰ বাবে বায়’ টয়লেটসমূহ ব্যৱহাৰৰ অনুপযোগী হৈ পৰিছে৷ গুৱাহাটীৰ নেহৰু পার্ক, ফুড ভিলা, পৰিবহণ বিভাগৰ কার্যালয়, পাণবজাৰ, ফাঁচী বজাৰ আৰু খানাপাৰাস্থিত আঞ্চলিক বিজ্ঞান কেন্দ্রৰ সন্মুখৰ লগতে অন্যান্য স্থানত স্থাপন কৰা বায়’ টয়লেটসমূহ সম্পূর্ণৰূপে ব্যৱহাৰৰ অনুপযোগী হৈ পৰিছে৷ উল্লেখ্য যে প্রায় ৯.৫৩ কোটি টকা ব্যয় সাপেক্ষে মহানগৰীৰ বিভিন্ন স্থানত ৩০টা বায়’ টয়লেট স্থাপন কৰা হৈছিল৷ প্রতিটো স্থানত স্থাপন কৰা বায়’ টয়লেটৰ বাবদ ৩১ লাখৰো অধিক টকা ব্যয় কৰা হৈছিল৷ ২০১৮ৰ পৰা ২০২১বর্ষত নির্মিত এই বায়’ টয়লেটসমূহৰ অধিকাংশই এতিয়া ব্যৱহাৰৰ অনুপযোগী হৈ পৰিছে৷ সেয়েহে বায়’ টয়লেটসমূহৰ অত্যাধুনিক যন্ত্রাংশ বিকল হৈ পৰাৰ উপৰি জিৰণি চ’ৰাত পৰিণত হৈছে৷ ইপিনে খানাপাৰা উৰণ সেতুৰ তলৰ লগতে আঞ্চলিক বিজ্ঞান কেন্দ্রৰ সন্মুখত দীর্ঘদিন ধৰি পৰি আছে কোটি টকীয়া স্মার্ট চিটী প্রকল্পৰ বায়’ টয়লেট৷ পথচাৰীৰ সুবিধার্থে নির্মাণ কৰা বায়’ টয়লেটসমূহ পুনৰ কার্যক্ষম কৰা হ’ব বুলি বিভাগীয় কর্তৃপক্ষই ঘোষণা কৰিছিল যদিও বিগত তিনি বছৰে এয়া কার্যকৰী হৈ উঠা নাই৷