নিয়মীয়া বাৰ্তা, ২৩ ফেব্ৰুৱাৰীঃ আজি মৰিগাঁও সমষ্টিৰ বিধায়ক তথা অসম চৰকাৰৰ মীন উন্নয়ন নিগমৰ অধ্যক্ষ ৰমাকান্ত দেউৰীয়ে কপিলী উন্নয়ন খণ্ডৰ অন্তৰ্গত বৰভগীয়া গাঁও পঞ্চায়তত দুটাকৈ আধাৰশিলা আৰু চৰাইবাহী গাঁও পঞ্চায়তত এটি বজাৰ গৃহ উদ্বোধন কৰে ৷
বিধায়কগৰাকীয়ে অসম চৰকাৰৰ অসম দৰ্শন আঁচনিৰ অধীনত ২ লাখ ৫০ হাজাৰ টকাৰে নিৰ্মাণ হ’ব লগা বৰভগীয়া গাঁও পঞ্চায়তৰ ন-বড়ি নাম ঘৰ আৰু ২০২০ – ২১ বৰ্ষৰ আনটাইড পুঁজিৰ ৫ লাখ টকাৰে নিৰ্মাণ হ’ব লগা চৰাইবাহী মায়েঙীয়া সাংস্কৃতিক কেন্দ্ৰৰ আধাৰশিলা স্থাপন কৰে ৷
আনহাতে ৬৪ নং চৰাইবাহী গাঁও পঞ্চায়তৰ ২০১৭ – ১৮ বৰ্ষৰ চতুৰ্দশ বিত্তীয় আয়োগৰ অধীনত নিৰ্মাণ হোৱা দৈনিক বজাৰ গৃহৰ আনুষ্ঠানিকভাৱে শুভাৰম্ভ কৰে বিধায়ক ৰমাকান্ত দেউৰীয়ে ৷ এই অনুষ্ঠানত চৰাইবাহী গাঁও পঞ্চায়তৰ সভানেত্ৰী কৰবী খাটনিয়াৰ ডেকা, কপিলী উন্নয়ন খণ্ডৰ খণ্ড বিষয়া বিউটী ডেকাৰ লগতে কেইবাগৰাকীও বিষয়া আৰু দলীয় কৰ্মী উপস্থিত থাকে ৷