নিয়মীয়া বাৰ্তা, ২৮ নৱেম্বৰঃ পুনৰ শনিবাৰে মৰিগাঁৱত ফাদিল হ’ল দশম শ্রেণীৰ ছয় মাহিলি পৰীক্ষাৰ বিজ্ঞানৰ প্রশ্ণকাকত৷ প্রাপ্ত তথ্য মতে, মৈৰাবাৰী অঞ্চলৰ এখন ব্যক্তিগত খণ্ডৰ বিদ্যালয়ৰ পৰাই এই প্রশ্ণকাকত ফাদিল হৈছে৷ অভিযোগ মতে, একাংশ ব্যক্তিগত খণ্ডৰ বিদ্যালয়ৰ মাজত গোপন মিত্রতা গঢ়ি উঠিছে এই পৰীক্ষাক কেন্দ্র কৰি৷ কিয়নো যোৱা বর্ষৰ মেট্রিক পৰীক্ষাৰ ফলাফলত এই ধৰণৰ পৰীক্ষাৰ মূল্যায়নে নির্ণায়ক ভূমিকা লৈছিল৷ ক’ভিডৰ তৃতীয় ঢ়ৌ আহিলে পৰিস্থিতিগত কাৰণত মেট্রিক পৰীক্ষা পাতিব নোৱাৰিলে এই ছয় মাহিলি পৰীক্ষাৰ নম্বৰে বিশেষ প্রাধান্য পাব বুলি অনুমান কৰি এই প্রশ্ণকাকত ফাদিল অভিযানত নামি পৰিছে এটা বিশেষ চক্র৷
মৰিগাঁৱৰ উপায়ুক্ত প্রকাশৰঞ্জন ঘৰফলীয়াই এই সন্দর্ভত কয় যে ব্যক্তিগত খণ্ডৰ কেইখনমান বিদ্যালয়ে ফলাফল ভাল কৰিবলৈ এই দুষ্কর্মত লিপ্ত হৈছে৷ উপায়ুক্তগৰাকীয়ে কয়– অচিৰেই এই চক্রটো চিহ্ণিত হ’ব আৰু কঠোৰ আইনগত ব্যৱস্থা লোৱা হ’ব৷ আনহাতে, বর্তমান চলি থকা পৰীক্ষা পৰিচালনা পদ্ধতি সন্দর্ভতো প্রশ্ণ উত্থাপন হৈছে৷ অধিবিদ্যা পৰিষদসমূহে এই পৰীক্ষা পৰিচালনা কৰি আছে৷ মৰিগাঁও জিলা আভ্যন্তৰীণ পৰীক্ষা সমিতিয়েই এই পৰীক্ষাৰ কর্মকর্তা৷ অসম চৰকাৰৰ অনুমোদিত এই সমিতিখনৰ অধ্যক্ষ হৈছে উপায়ুক্ত, উপাধ্যক্ষ, বিদ্যালয়সমূহৰ পৰিদর্শক, সচিব হৈছে মৰিগাঁও জিলা অধিবিদ্যা পৰিষদৰ সম্পাদকজন৷
মৰিগাঁও জিলা হাইস্কুল শিক্ষক সংস্থা, মৰিগাঁও জিলা মাধ্যমিক শিক্ষক–কর্মচাৰী সন্থাৰ সম্পাদক দুজন সদস্য৷ দুজন ব্যক্তিগত বিদ্যালয় প্রতিনিধি সদস্য হোৱাৰ লগতে ৰঙাদৰিয়া উচ্চতৰ মাধ্যমিক বিদ্যালয়ৰ অধ্যক্ষগৰাকী পৰীক্ষা সমিতিৰ সদস্য৷ এগৰাকী অৱসৰপ্রাপ্ত প্রধান শিক্ষকে মেণ্টৰ হিচাপে কার্যনির্বাহ কৰি আছে৷ এনে উচ্চ ক্ষমতাসম্পন্ন সমিতিখনৰ পৰীক্ষা পর্যবেক্ষণ আৰু নিয়ন্ত্রণৰ ব্যর্থতাৰ বাবেই এই ছয় মাহিলি পৰীক্ষাত দ্বিতীয়বাৰৰ বাবে প্রশ্ণকাকত ফাদিল হোৱা বুলি অনুমান কৰা হৈছে৷ উল্লেখ্য যে যোৱা ২৫ নৱেম্বৰত নৱম আৰু দশম শ্রেণীৰ প্রশ্ণকাকত ফাদিল হোৱাত পৰীক্ষা বাতিল কৰিবলগীয়া হৈছিল৷ আজিও মৰিগাঁৱৰ উপায়ুক্তই দশম শ্রেণীৰ বিজ্ঞানৰ পৰীক্ষা বাতিল কৰিছে৷